Rajkot: PGVCL નો અત્યાર સુધીનો સૌથી મોટો સપાટો, 5 દિવસના મેગા સર્ચ ઓપરેશનમાં 1.50 કરોડની વીજચોરી ઝડપાઈ

પશ્ચિમ ગુજરાત વિજ કંપની લિમિટેડ (PGVCL) ના મેનેજિંગ ડિરેક્ટરની સીધી સૂચના હેઠળ રાજકોટ રીજિયનમાં વીજચોરો સામે સર્જિકલ સ્ટ્રાઈક સમાન મોટી કાર્યવાહી હાથ ધરવામાં આવી છે. લાંબા સમયથી અમુક ચોક્કસ વિસ્તારોમાં લાઇન લોસ (વીજ વયય) નું પ્રમાણ ખૂબ જ ઊંચું આવી રહ્યું હોવાની ટેકનિકલ આશંકાઓને આધારે, કંપનીના ઉચ્ચ અધિકારીઓએ એક ગુપ્ત માસ્ટર પ્લાન તૈયાર કર્યો હતો. આ પ્લાન અંતર્ગત છેલ્લા ૫ દિવસથી સમગ્ર રાજકોટના અલગ-અલગ ઝોનમાં વ્યાપક પાવર ઓડિટ અને માસ ચેકિંગ ડ્રાઇવ લોન્ચ કરવામાં આવી હતી, જેમાં અત્યાર સુધીની રેકોર્ડબ્રેક ₹૧.૫૦ કરોડની પાવર ચોરી પકડી પાડવામાં વિજિલન્સ ટીમને સફળતા મળી છે.

178 ટીમોનું વ્યાપક નેટવર્ક અને જપ્ત કરાયેલા કનેક્શનો

આ ઓપરેશનને એટલું ગુપ્ત રાખવામાં આવ્યું હતું કે સ્થાનિક સ્ટાફને પણ દરોડાની આગલી મિનિટ સુધી લોકેશનની જાણ નહોતી. જુદા-જુદા સર્કલમાંથી બોલાવાયેલા ડેપ્યુટી એન્જિનિયરો, લાઇનમેનો અને એસઆરપી (SRP) પોલીસ પ્રોટેક્શન સાથેની કુલ 178 વિશેષ ટીમો મેદાનમાં ઉતારવામાં આવી હતી. આ ટીમોએ રાજકોટના 70 જેટલા હાઈ-રિસ્ક રહેણાંક પંથકો, સ્લમ વિસ્તારો અને કોમર્શિયલ એસ્ટેટમાં એકસાથે સરપ્રાઈઝ ચેકિંગ હાથ ધર્યું હતું. સઘન તપાસ દરમિયાન મીટર બાયપાસ કરવા, અદ્યતન રીમોટ કંટ્રોલથી રીડિંગ ધીમું કરવા અને મુખ્ય વીજ લાઇન પર સીધા વાયર (લંગરિયા) નાખીને મફત વીજળી વાપરવાના કૌભાંડો પકડાયા હતા. ગંભીર ગુનાહિત ગેરરીતિ દાખવનારા ૩૬૫ ગ્રાહકોના કનેક્શન તાત્કાલિક અસરથી કાપીને વાયરો જપ્ત કરી લેવાયા હતા.

આગામી દિવસોમાં કાનૂની આકરી કાર્યવાહી

PGVCL ના વરિષ્ઠ અધિકારીના જણાવ્યા અનુસાર, જે ૩૬૫ જોડાણો કાપવામાં આવ્યા છે તે તમામ ગ્રાહકોને ભારતીય વીજળી અધિનિયમની કલમ 135 હેઠળ કરોડો રૂપિયાના દંડનાત્મક પૂરક બિલો (પેનલ્ટી બિલ) ફટકારવાની પ્રક્રિયા શરૂ કરી દેવામાં આવી છે. જો નિયત સમય મર્યાદામાં આ દંડની રકમ ભરપાઈ કરવામાં નહીં આવે, તો આ તમામ સામે વીજ જોડાણ કાયમી ધોરણે રદ કરી સ્પેશિયલ પાવર થેફ્ટ કોર્ટમાં ફોજદારી ગુના હેઠળ કેસ ચલાવી જેલ ભેગા કરવાની કડક કાનૂની તજવીજ હાથ ધરાશે. PGVCL ની આ કડક કવાયતથી વીજચોરી કરતા તત્વોમાં ભારે ફફડાટ વ્યાપી ગયો છે, જ્યારે પ્રામાણિકપણે બિલ ભરતા સામાન્ય નાગરિકોએ તંત્રના આ પગલાને બિરદાવ્યું છે.

આ પણ વાંચો: Ahmedabad: કેન્દ્રીય ગૃહમંત્રી સાયન્સ સિટીથી સામૂહિક વૃક્ષારોપણ અભિયાનનો પ્રારંભ કરાવશે, 405 કરોડના વિકાસકાર્યોની આપશે ભેટ