Navsariના ચીખલીમાં ચાલુ વરસાદે દોડતી કારમાં લાગી ભીષણ આગ, સવાર લોકોનો આબાદ બચાવ

નવસારી જિલ્લાના ચીખલી તાલુકામાંથી એક અત્યંત ચોંકાવનારી અને હડકંપ મચાવતી ઘટના સામે આવી છે. ચીખલીના સાદકપોર ગોલવાડ વિસ્તારની સીમમાંથી પસાર થઈ રહેલી એક લક્ઝુરિયસ સ્કોડા કારમાં ચાલુ વરસાદ દરમિયાન અચાનક જ ભીષણ આગ ફાટી નીકળી હતી. ધોધમાર વરસાદ પડી રહ્યો હોવા છતાં કારમાં લાગેલી આગ એટલી પ્રચંડ હતી કે જોતજોતામાં આખી કાર ધડાધડ સળગવા લાગી હતી અને આગના ગોળામાં ફેરવાઈ ગઈ હતી.

સમયસૂચકતાથી જાનહાનિ ટળી, સુરત પાસિંગની કાર

પ્રાપ્ત વિગતો અનુસાર, સળગીને ખાખ થઈ ગયેલી આ સ્કોડા કાર સુરત પાસિંગની (GJ-05) હોવાનું માલૂમ પડ્યું છે. કારના એન્જિનમાંથી અચાનક ધુમાડા નીકળતા જોઈને ચાલકે તુરંત જ ગાડી રોકી દીધી હતી. કારમાં સવાર તમામ મુસાફરોએ સમયસૂચકતા વાપરીને સેકન્ડોની અંદર જ બહાર કૂદી પડ્યા હતા, જેના કારણે એક બહુ મોટી જાનહાનિ ટળી ગઈ હતી. પ્રાથમિક દ્રષ્ટિએ વાયરિંગમાં શોર્ટ સર્કિટ થવાના કારણે આ ભયાનક આગ લાગી હોવાની આશંકા સેવાઈ રહી છે.

બીલીમોરા ફાયર ફાઈટરે આગ પર મેળવ્યો કાબૂ

હાઈવે પર કાર ભડભડ સળગતી હોવાની વિગતો મળતાં જ સ્થાનિક લોકોમાં ભારે અફરાતફરી મચી ગઈ હતી અને વાહનવ્યવહાર થોડો સમય માટે રોકાઈ ગયો હતો. ઘટના અંગે તાત્કાલિક ફાયર બ્રિગેડને જાણ કરાતા બીલીમોરા ફાયર ફાઈટરની ટીમ તાબડતોબ ઘટનાસ્થળે દોડી આવી હતી. ફાયર જવાનોએ પાણીનો ભારે મારો ચલાવીને ટૂંક સમયમાં જ આગ પર સંપૂર્ણ કાબૂ મેળવ્યો હતો. જોકે, આગ એટલી ભીષણ હતી કે લક્ઝરી કાર કુરચો થઈને રીતસર બળીને ખાખ થઈ ગઈ હતી.

ગુજરાતના વધુ સમાચાર વાંચવા માટે ક્લિક કરો