Narmada:દેડિયાપાડા તાલુકામાં મેઘરાજા મહેરબાન થતાં ખેડૂતો ખુશ

દેડિયાપાડા તાલુકામાં આ ચોમાસામાં વરસાદના આગમન બાદ મેઘરાજાએ વિરામ લીધો હતો જેના કારણે ગરમી અને બફારાનું સામ્રાજ્ય જોવા મળતુ હતું. ખેડૂતો પણ વરસાદના અભાવે ચિંતિત બન્યા હતા દરમિયાન ફરી એક વખત મેઘરાજા મહેરબાન થતાં ખેડૂતોમાં ખુશીનો માહોલ જોવા મળી રહ્યો છે.

દેડિયાપાડા સહિત સમગ્ર તાલુકામાં ગત રાત્રિથી વરસાદ ધીમીધારે શરૂ થયો હતો. આજે તા. 20 ના રોજ સવારે 9વાગ્યાથી જોરદાર વરસાદ પડવાનું શરૂ થયું હતું. પાછો ધીમીધારે ક્યારેય જોરદાર ઝાપટાંના સ્વરૂપે વરસાદ શરૂ થયો હતો. કરજણ નદી, તરાવ નદી, દેવ નદી, ધામણ ખાડી અને ખાડી કોતરોમાં વરસાદના પાણી વહેતાં નજરે પડતાં હતાં. આ વિસ્તારમાં આવેલા ચેકડેમો ફરીવાર ઓવરફ્લો થયા હતા. ડુંગરો માં ઝરણાં ફૂટી નીકળ્યા છે. દેડિયાપાડા તાલુકામાં જ્યાં જુઓ ત્યાં વરસાદના પાણી વહેતાં નજરે પડે છે. ખેડૂતોના ખેતરમાં કપાસ મકાઈ ડાંગર તુવેર અને શાકભાજીના પાકને આ અમૃત તુલ્ય વરસાદથી ઘણો ફાયદો થયો છે. ખેડૂતો ખુશખુશાલ થઇ ગયા છે. આકાશી વાતાવરણ ઉપરથી લાગી રહ્યું છે કે હજુ વધુ વરસાદ પડશે. વાતાવરણમાં ઠંડક પ્રસરી ગઇ છે. ચોમાસું ફરીથી શરૂ થયું હોય એવું લાગી રહ્યું છે.