Kutch News: નખત્રાણાના ધાવડા-દેવપર વચ્ચે ટ્રક અને કાર વચ્ચે જોરદાર ટક્કર, અકસ્માતમાં બે લોકોના કરુણ મોત

કચ્છ જિલ્લાના નખત્રાણા તાલુકામાં આજે એક કાળજું ધ્રુજાવી દેતી અકસ્માતની ઘટના સામે આવી છે. નખત્રાણાના ધાવડા અને દેવપર વચ્ચે પસાર થઈ રહેલી એક કાર અને ટ્રક વચ્ચે સામસામે જોરદાર ટક્કર થઈ હતી. અકસ્માત એટલો ભીષણ હતો કે કારનો અકસ્માત બાદ કચ્ચરઘાણ વળી ગયો હતો. હાઈવે પર થયેલી આ ટક્કરના અવાજથી આસપાસના લોકો તાત્કાલિક મદદ માટે દોડી આવ્યા હતા.

બાળકી સહિત બે ગંભીર રીતે ઇજાગ્રસ્ત

આ કરુણ દુર્ઘટનામાં કારમાં સવાર બે વ્યક્તિઓના ઘટના સ્થળે જ કમકમાટીભર્યા મોત નીપજ્યા છે. જ્યારે કારમાં સવાર અન્ય એક માસૂમ બાળકી અને એક વ્યક્તિને ગંભીર ઈજાઓ પહોંચી છે. ઘટનાની જાણ થતા જ 108 એમ્બ્યુલન્સની ટીમ તાત્કાલિક ઘટના સ્થળે પહોંચી હતી અને બચાવ કામગીરી હાથ ધરી હતી. ઇજાગ્રસ્ત બાળકી અને અન્ય વ્યક્તિને તાત્કાલિક ધોરણે નજીકની હોસ્પિટલમાં સારવાર અર્થે ખસેડવામાં આવ્યા છે, જ્યાં તેમની હાલત નાજુક હોવાનું જાણવા મળી રહ્યું છે.

ટ્રાફિક જામ અને પોલીસ તપાસ

અકસ્માતને પગલે હાઈવે પર વાહનોની લાંબી કતારો લાગી હતી. સ્થાનિક પોલીસે ઘટના સ્થળે પહોંચી મૃતદેહોને પોસ્ટમોર્ટમ માટે ખસેડવાની તજવીજ હાથ ધરી છે અને અકસ્માતનો ગુનો નોંધી વધુ તપાસ શરૂ કરી છે. ટ્રક ચાલકની બેદરકારી હતી કે અન્ય કોઈ કારણ, તે દિશામાં પોલીસ તપાસ કરી રહી છે. એકસાથે બે લોકોના મોતથી મૃતકના પરિવારમાં માતમ છવાઈ ગયો છે.

ગુજરાતના વધુ સમાચાર વાંચવા માટે ક્લિક કરો