Khedaના મહેમદાવાદમાં રખડતા ઢોરનો આતંક સામે આવ્યો, બે ગાયોએ મહિલાને ફંગોળી

ખેડાના મહેમદાવાદમાં રખડતા ઢોરનો આતંક યથાવત છે. ખાત્રજ ગામમાં રખડતી બે ગાયોએ એક મહિલા પર જીવલેણ હુમલો કરતાં ગામમાં ભયનો માહોલ ફેલાયો છે. આ ઘટનામાં મહિલાને ગંભીર ઈજાઓ પહોંચી છે અને તેને તાત્કાલિક હોસ્પિટલમાં ખસેડવામાં આવી છે. આ ઘટના ત્યારે બની જ્યારે મહિલા પોતાના ઘર પાસે હતી. અચાનક બેફામ દોડતી બે ગાયોએ મહિલા પર હુમલો કર્યો હતો અને તેને માથાના ભાગે શિંગડા માર્યા હતા.

રખડતી ગાયોએ મહિલા પર જીવલેણ હુમલો કર્યો હતો

આ હુમલામાં મહિલાને માથામાં ત્રણ જગ્યાએ ગંભીર ઈજાઓ થઈ છે. મહિલાની ચીસો સાંભળીને આસપાસના લોકો દોડી આવ્યા હતા. સ્થાનિકોએ તાત્કાલિક લાકડીઓ લઈને ગાયોને ભગાડી હતી અને મહિલાને બચાવી હતી. ત્યાર બાદ ઈજાગ્રસ્ત મહિલાને તાત્કાલિક સારવાર માટે ખાનગી હોસ્પિટલમાં ખસેડવામાં આવી હતી. હાલ તેની હાલત ગંભીર હોવાનું જાણવા મળ્યું છે.

મહિલાને ખાનગી હોસ્પિટલમાં સારવાર માટે ખસેડવામાં આવી

આ ઘટનાથી સ્થાનિકોમાં ભારે રોષ ફેલાયો છે. વારંવાર રખડતા ઢોરની સમસ્યાનો યોગ્ય ઉકેલ લાવવા માટે સ્થાનિક તંત્રની નિષ્ફળતા પર લોકો સવાલો ઉઠાવી રહ્યા છે. અગાઉ પણ આવા ઘણા બનાવો બન્યા હોવા છતાં તંત્ર દ્વારા કોઈ પગલાં ભરવામાં ન આવતા ગ્રામજનોમાં રોષ બમણો થયો છે. તેવામાં આ ઘટનાએ ફરી એકવાર રખડતા ઢોરની સમસ્યાને ગંભીરતાથી લેવાની જરૂરિયાત પર ભાર મૂક્યો છે.