Kheda: મહેમદાવાદ હત્યા કેસ, શરદ પૂનમની રાત્રે યુવકને મોતને ઘાટ ઉતારનાર આરોપી ઝડપાયો

ખેડા જિલ્લાના મહેમદાવાદ તાલુકાના સણસોલી ગામમાં શરદ પૂનમની રાત્રે થયેલી હત્યાનો ભેદ પોલીસે ઉકેલી કાઢ્યો છે. સામાન્ય બાબતે થયેલી બોલાચાલીમાં છાતીમાં ચપ્પાના ઘા મારીને યુવકની હત્યા કરનાર આરોપીને મહેમદાવાદ પોલીસે ગણતરીના સમયમાં જ ઝડપી પાડ્યો છે.

ગરબા દરમિયાન સામાન્ય બોલાચાલી બની જીવલેણ

આ ઘટના સણસોલી ગામના મસાણી માતાના મંદિર પાસે શરદ પૂનમના રોજ રાત્રે બની હતી. ગરબાના કાર્યક્રમ દરમિયાન બે યુવકો વચ્ચે સામાન્ય બાબતે બોલાચાલી થઈ હતી, જેણે ગંભીર સ્વરૂપ ધારણ કર્યું હતું. આ ઝઘડામાં સંદીપ ઉર્ફે સચિન નામના 19 વર્ષીય યુવકને છાતીના ભાગે ચપ્પાના બે ઘા મારી દેવામાં આવ્યા હતા, જેના કારણે તેનું ઘટનાસ્થળે જ મૃત્યુ થયું હતું.

આરોપી કિશન ઉર્ફે અજય ડાભીની ધરપકડ

હત્યાની ઘટનાને અંજામ આપીને ફરાર થયેલા આરોપીને ઝડપી પાડવા માટે મહેમદાવાદ પોલીસે તાત્કાલિક કાર્યવાહી હાથ ધરી હતી. પોલીસે હ્યુમન ઇન્ટેલિજન્સ અને બાતમીદારોની મદદથી આરોપી કિશન ઉર્ફે અજય હસમુખભાઈ ડાભીને ઝડપી પાડ્યો છે. આરોપી કિશન ડાભી પણ મહેમદાવાદનો જ રહેવાસી છે. સામાન્ય ઝઘડામાં નિર્દોષ યુવક સચિનને મોતને ઘાટ ઉતારનાર આરોપી કિશન વિરુદ્ધ પોલીસે હત્યાનો ગુનો નોંધીને કાયદેસરની કાર્યવાહી હાથ ધરી છે. આ ઘટનાને કારણે શરદ પૂનમની ખુશાલીના માહોલમાં શોકનું મોજું ફરી વળ્યું છે.