Godhara News: 10મા ધોરણમાં ભણતા કિશોરે સુતળી બોમ્બ સળગાવીને તેની પર સ્ટીલનો ગ્લાસ મુક્યો, જાણો પછી શું થયું

દિવાળી આવતાં જ અલગ અલગ રીતે લોકો ફટાકડા ફોડવાની મજા માણતા હોય છે. જેમાં કેટલાક લોકો સુતળી બોમ્બની ઉપર કોઈ વાસણ કે અન્ય ચીજ વસ્તુ મુકીને બોમ્બ ફોડવાની મજા માણતા હોય છે. ત્યારે ગોધરા તાલુકાના બગીડોળ અંબાલી ગામમાં સ્ટીલના ગ્લાસમાં ફટાકડા ફોડવાનો અખતરો ભારે પડ્યો છે. બોમ્બ ફોડતા કિશોરના મોઢાના ભાગે ગંભીર ઈજા થતાં તેને સારાવાર માટે હોસ્પિટલમાં મોકલવામાં આવ્યો હતો.

કિશોરને સારવાર માટે વડોદરા ખસેડવામાં આવ્યો

પ્રાપ્ત વિગતો પ્રમાણે ગોધરા તાલુકાના બગીડોળ આંબલી ગામમાં એક કિશોરે ગ્લાસમાં સુતળી બોમ્બ મુકીને સળગાવ્યો હતો. આ દરમિયાન બોમ્બ ફૂટતા કિશોરના મોઢાના ભાગે ઈજા પહોંચી હતી. કિશોરે બોમ્બ સળગાવીને તેની પર ગ્લાસ મુકી દેતા ગ્લાસના ટુકડા થઈને કિશોરના મોંઢા પર વાગ્યા હતાં. જેમાં ગંભીર રીતે ઈજા પામેલા કિશોરને સારવાર માટે વડોદરા ખસેડવામાં આવ્યો હતો.

ગ્લાસના ટુકડાનો કેટલોક ભાગ કિશોરના નાકના ભાગે વાગ્યો

ધોરણ 10માં અભ્યાસ કરતા અનમોલ નામના કિશોરે પોતાના ઘર આંગણે જ સુતળી બોમ્બ સળગાવીને તેની પર સ્ટીલનો ગ્લાસ મુક્યો હતો. બોમ્બ ફૂટતાની સાથે જ ગ્લાસના ટુકડા થઈ ગયા હતાં. ગ્લાસના ટુકડાનો કેટલોક ભાગ કિશોરના નાકના ભાગે વાગ્યો હતો. કિશોરને બોમ્બ ફોડવા માટે અખતરો કરવો ભારે પડી ગયો હતો.