Gandhinagar: હડતાળ વચ્ચે સરકાર સાથે બેઠક સફળ? મહેસૂલી કર્મચારીઓના ગ્રેડ પે સહિતના પ્રશ્નો ઉકેલવા બનશે કમિટી

ગુજરાતમાં મહેસૂલી કર્મચારીઓની અચોક્કસ મુદતની હડતાળ વચ્ચે સરકાર અને કર્મચારી મંડળ વચ્ચે મહત્વની બેઠક યોજાઈ હતી. કર્મચારી મંડળે બેઠક સફળ રહી હોવાનો દાવો કર્યો છે. બેઠકમાં કર્મચારીઓના પડતર પ્રશ્નો અંગે ચર્ચા થઈ હતી અને હવે આ પ્રશ્નોના ઉકેલ માટે કમિટી બનાવવાનો નિર્ણય લેવાયો હોવાનું જણાવાયું છે.

જીતુ વાઘાણી અને સંજયસિંહ મહીડા સાથે બેઠક

મહેસૂલી કર્મચારીઓના પ્રશ્નોને લઈને કૃષિ મંત્રી જીતુ વાઘાણી તથા મહેસૂલ મંત્રી સંજયસિંહ મહીડા સાથે કર્મચારી પ્રતિનિધિઓની બેઠક મળી હતી. બેઠકમાં લાંબા સમયથી પડતર રહેલા વિવિધ પ્રશ્નો અંગે ચર્ચા કરવામાં આવી હતી. ખાસ કરીને કર્મચારીઓના સેવા સંબંધિત મુદ્દાઓ અને ગ્રેડ પે અંગે ચર્ચા થઈ હોવાનું જણાવાયું છે.

હવે અધિક મુખ્ય સચિવની અધ્યક્ષતામાં કમિટી

મહેસૂલી કર્મચારીઓના પ્રશ્નોના ઉકેલ માટે અધિક મુખ્ય સચિવ ડો. જયંતી રવિની અધ્યક્ષતામાં કમિટી બનાવવામાં આવશે. આ કમિટી કર્મચારીઓની વિવિધ માંગણીઓનો અભ્યાસ કરશે અને કયા મુદ્દે શું નિર્ણય લઈ શકાય તે અંગે સરકાર સમક્ષ ચર્ચા કરશે.ગ્રેડ પેના મુદ્દે પણ થશે ચર્ચા

મહેસૂલી કર્મચારીઓ માટે સૌથી મહત્વના ગણાતા ગ્રેડ પેના પ્રશ્નને પણ કમિટીની ચર્ચામાં સામેલ કરવામાં આવશે. કર્મચારીઓ લાંબા સમયથી પગારધોરણ, ગ્રેડ પે, પ્રમોશન, બદલી અને અન્ય સેવા સંબંધિત મુદ્દાઓના ઉકેલની માંગ કરી રહ્યા છે. રાજ્યવ્યાપી હડતાળના મુખ્ય મુદ્દાઓમાં પણ આવા પ્રશ્નો સામેલ છે.કર્મચારી મંડળે સરકારની વાત સ્વીકારી હોવાનો દાવો

બેઠક બાદ મહેસૂલી કર્મચારી મંડળે સરકાર તરફથી કરવામાં આવેલી વાતચીત અને પ્રક્રિયાને સ્વીકારી હોવાનો દાવો કર્યો છે. હવે કમિટી ક્યારે રચાય છે અને કર્મચારીઓના પ્રશ્નો અંગે કયા નિર્ણય લેવાય છે તેના પર સૌની નજર રહેશે.હડતાળનો અંત આવશે કે નહીં?

રાજ્યમાં 7 ઓક્ટોબરથી મહેસૂલી કર્મચારીઓ હડતાળ પર ઉતર્યા છે અને તેના કારણે વિવિધ મહેસૂલી કચેરીઓની કામગીરીને અસર થઈ રહી છે. સરકાર સાથેની બેઠક બાદ હવે કમિટી રચવાની જાહેરાતથી હડતાળ અંગે આગળનું ચિત્ર સ્પષ્ટ થવાની શક્યતા છે.  

આ પણ વાંચો    :    Nana Patekar : નાનાએ કર્યું પત્રકારનું ‘એન્કાઉન્ટર’! પહેલા રંગમંચ પરથી ધક્કો મારીને મને ઉતાર્યો અને...