Deesaમાં ફૂડ એન્ડ ડ્રગ્સ વિભાગના દરોડા, શંકાસ્પદ ઘીનો રૂ.4.15 લાખનો જથ્થો કર્યો જપ્ત

બનાસકાંઠાના ડીસા GIDC વિસ્તારમાં આવેલા ઘી ઉત્પાદક એકમો પર આજે ફૂડ એન્ડ ડ્રગ્સ વિભાગ દ્વારા સંયુક્ત રીતે દરોડા પાડવામાં આવ્યા હતા. ફૂડ સેફ્ટી અને ગુણવત્તાના માપદંડોની ચકાસણી માટે આ કાર્યવાહી હાથ ધરવામાં આવી હતી. દરોડા દરમિયાન ડીસા GIDC સ્થિત બહુચર ડેરી પ્રોડક્ટ્સ નામના એકમમાં સઘન તપાસ કરવામાં આવી હતી. ફૂડ સેફ્ટીની ટીમે અહીંથી શંકાસ્પદ જણાતા ઘીનો મોટો જથ્થો જપ્ત કર્યો હતો.

4.15 લાખનો 734 કિગ્રા.ઘીનો જથ્થો જપ્ત

ટીમે કુલ 734 કિલોગ્રામ ઘીનો જથ્થો જપ્ત કર્યો હતો. જેની અંદાજિત બજાર કિંમત રૂ. 4.15 લાખ જેટલી થાય છે. આ ઘીની ગુણવત્તા અને શુદ્ધતા શંકાસ્પદ જણાતા તેને તત્કાલ જપ્ત કરવામાં આવ્યો હતો. ફૂડ એન્ડ ડ્રગ્સ વિભાગ દ્વારા હવે આ શંકાસ્પદ ઘીના નમૂનાઓ લેવામાં આવ્યા છે. આ તમામ નમૂનાઓને વધુ ચકાસણી અર્થે લેબોરેટરી ખાતે મોકલવાની કાર્યવાહી હાથ ધરવામાં આવી છે.

ઘીના શંકાસ્પદ નમૂનાઓ લેબમાં મોકલાશે

લેબ રિપોર્ટ આવ્યા બાદ જ ઘીની ગુણવત્તાનું ચોક્કસપણે નિદાન થશે અને ત્યારબાદ આગળની કાયદેસરની કાર્યવાહી કરવામાં આવશે. બનાસકાંઠામાં ફૂડ સેફ્ટી વિભાગની આ કાર્યવાહીના કારણે અન્ય ઘી ઉત્પાદક એકમોમાં પણ ફફડાટ વ્યાપી ગયો છે. જનતાના સ્વાસ્થ્ય સાથે ચેડા ન થાય તે સુનિશ્ચિત કરવા માટે વિભાગે કડક પગલાં લેવાની ખાતરી આપી છે.