Botad News: કરિયાણાની દુકાન ચલાવતા શખ્સની હેવાનિયત, સામાન લેવા આવેલી બાળકીને પીંખી નાંખી

બોટાદ જિલ્લાના ગ્રામ્ય વિસ્તારમાં એક હૃદયદ્રાવક ઘટના સામે આવી છે, જેમાં કરિયાણાની દુકાન ચલાવતા એક આધેડ વયના શખ્સે 12 વર્ષની સગીરાની માસૂમિયતને પીંખી નાખી હતી. આ ઘટનાને પગલે સમગ્ર જિલ્લામાં ભારે રોષ જોવા મળી રહ્યો છે. જોકે, બોટાદ પોલીસે ગણતરીની કલાકોમાં જ નરાધમ આરોપીને દબોચી લઈને કાયદાનું ભાન કરાવ્યું છે.

દુકાને સામાન લેવા ગઈ અને નરાધમ ત્રાટક્યો

ઘટનાની મળતી માહિતી અનુસાર, ભોગ બનનાર 12 વર્ષીય સગીરા ગામમાં જ આવેલી જેરામ ઈશ્વર ભાલાળાની કરિયાણાની દુકાને ઘરનો સામાન લેવા માટે ગઈ હતી. માસૂમ બાળકીને એકલી જોઈને આરોપી જેરામની દાનત બગડી હતી. તેણે સગીરાને બળજબરીથી પકડી લીધી હતી અને દુકાનની બાજુમાં જ આવેલા પોતાના ઘરે લઈ ગયો હતો, જ્યાં તેણે સગીરા પર દુષ્કર્મ આચર્યું હતું.

પોલીસની તાત્કાલિક કાર્યવાહી

આ બનાવની જાણ થતા જ સગીરાના પરિવારે હિંમત દાખવી પાળીયાદ પોલીસ મથકે જેરામ ભાલાળા વિરૂદ્ધ ફરિયાદ નોંધાવી હતી. કેસની ગંભીરતાને જોતા બોટાદના ડીવાયએસપી (DySP) મનીષા દેસાઈ એ તાત્કાલિક અલગ-અલગ ટીમો બનાવી આરોપીને પકડવા માટે ચક્રો ગતિમાન કર્યા હતા.

સગીરાઓની સુરક્ષા સામે ગંભીર સવાલો

ટેકનિકલ સર્વેલન્સ અને બાતમીદારોની મદદથી પોલીસે ગણતરીની કલાકોમાં જ આરોપી જેરામ ઈશ્વર ભાલાળાને ઝડપી લઈને જેલના સળિયા પાછળ ધકેલી દીધો છે. હાલમાં પોલીસે આરોપી વિરૂદ્ધ પોક્સો (POCSO) એક્ટ અને દુષ્કર્મની કલમો હેઠળ ગુનો નોંધી આગળની તપાસ હાથ ધરી છે. આ ઘટનાએ ફરી એકવાર સગીરાઓની સુરક્ષા સામે ગંભીર સવાલો ઉભા કર્યા છે.

આ પણ વાંચો - Botad News : બોટાદ શહેરમાં 6 થી 8 ફેબ્રુઆરી સુધી પાણી વિતરણ બંધ રહેશે, જાણો આ છે કારણ