Bhavnagarના ધોળા ગામે ગોડાઉનમાં લાગી ભીષણ આગ, ફ્રુટની દુકાનો અને લાતીના માલસામાનને ભારે નુકસાન

ભાવનગર જિલ્લાના ઉમરાળા તાલુકાના ધોળા ગામે એક ગોડાઉનમાં ભીષણ આગ લાગવાની ઘટના સામે આવી છે. ધોળા જંકશનની મુખ્ય બજારમાં આવેલી એક ફ્રુટની દુકાન અને લાતીમાં લાગેલી આગે વિકરાળ સ્વરૂપ ધારણ કર્યું છે. જેના કારણે લાખોનું નુકસાન થવાની ભીતિ સેવાઈ રહી છે. ઘટનાની જાણ થતાં જ પોલીસ અને 108ની ટીમ તાત્કાલિક ઘટનાસ્થળે પહોંચી ગઈ છે. પરંતુ ફાયર બ્રિગેડ મોડી પહોંચતા આગ વધુ ફેલાઈ હતી.

ધોળા ગામે ગોડાઉનમાં લાગી ભીષણ આગ

આજે ધોળા જંકશનની મુખ્ય બજારમાં આવેલી એક દુકાન અને ગોડાઉનમાં અચાનક આગ લાગી હતી. આગના ગોટેગોટા અને ધુમાડાના વાદળો જોઈને સ્થાનિક લોકોના ટોળા ઘટનાસ્થળે ઉમટી પડ્યા હતા. આગ એટલી વિકરાળ હતી કે જોતજોતામાં તેણે આસપાસની અન્ય દુકાનોને પણ ઝપેટમાં લેવાનું શરૂ કર્યું હતું. આગની જાણ થતાં જ તાત્કાલિક પોલીસ અને 108ની ટીમ ઘટનાસ્થળે પહોંચી ગઈ હતી. જોકે શરૂઆતમાં ફાયર બ્રિગેડની ગાડી સમયસર ન પહોંચતા આગે વધુ વિકરાળ રૂપ ધારણ કર્યું હતું.

ફાયર બ્રિગેડ ઘટનાસ્થળે જવા થઈ રવાના

આ મામલે મામલતદાર જાડેજા સાથે વાત કરતા તેમણે જણાવ્યું હતું કે વલ્લભીપુર નગરપાલિકાનું ફાયર ફાઈટર ઘટનાસ્થળે જવા રવાના થયું છે. આગનું કારણ હજુ સુધી જાણી શકાયું નથી. પરંતુ શોર્ટ સર્કિટ હોવાની શક્યતા સેવાઈ રહી છે. આગના કારણે ગોડાઉનમાં રાખેલ ફળફળાદી અને લાતીના માલસામાનને ભારે નુકસાન થયું છે. આ ઘટનાથી વેપારીઓમાં ભારે ચિંતાનો માહોલ છે. તંત્ર દ્વારા આગ પર કાબુ મેળવવા માટે પ્રયાસો કરવામાં આવી રહ્યા છે.