Bhavnagarના ગઢડાના ઢસા ગામેથી સ્ટેટ મોનિટરીંગ સેલે રૂપિયા 38 લાખનો દારૂ ઝડપ્યો

ગઢડા(સ્વામીના) તાલુકાના ઢસાગામે વિદેશી દારૂની જંગી હેરાફેરીની બાતમીના આધારે સ્ટેટ મોનિટરીંગ સેલ દ્વારા મેગા ઓપરેશન હાથ ધરવામાં આવતા ખીચોખીચ દારૂથી ભરેલી આઈસર ટ્રક મળી આવતા અનેક તર્કવિતર્કો વચ્ચે દારૂના કારોબાર સાથે જોડાયેલા લોકોમાં ફફડાટ ફેલાઇ ગયો હતો,પોલીસે દારૂ અને ટ્રકને જપ્ત કરી છે અને આઈસર ચાલકની ધરપકડ કરી છે. અલગ-અલગ બ્રાન્ડની બોટલો મળી આવી આ અંગે વધારે જાણવા મળતી વિગત અનુસાર ઢસા સ્થિત ભાવનગર રોડ ઉપરથી લાખો રૂપિયાનો વિદેશી દારૂ ભરેલી આઈસર ટ્રક પસાર થતી હોવાની બાતમીના આધારે સ્ટેટ મોનિટરીંગ સેલના પી.આઈ. એ.વી. પટેલ તથા સ્ટાફ દ્વારા ચાંપતી નજર રાખી એક આઈશર ટ્રક ઝડપી લેવામાં આવી હતી. આ આઈશર ટ્રકમાંથી કુલ 13,929 બોટલ મળી આવતા અંદાજે 645 જેટલો જુદી જુદી બ્રાન્ડની ભારતીય બનાવટની વિદેશી દારૂની પેટીઓ હોવાનુ પ્રાથમિક તબક્કે જાણવા મળ્યું હતુ. એસએમસીએ હાથધરી તપાસ આ દારૂના જથ્થાની અદાજીત કિંમત રૂપિયા 38,54,637 થવા પામે છે. આ દરમિયાન આઈશર ટ્રક અને દારૂ સહિત કુલ રૂપિયા 63,60,857નો મુદ્દામાલ પોલીસે જપ્ત કર્યો હતો. તેમજ આઈશર ટ્રક નંબર જી.જે. 08 એ. ડબલ્યુ 3034 ના ચાલક પુખરાજ ડુંગરરામ રાણા રહે બાડમેર રાજસ્થાન વાળાની અટકાયત કરી જરૂરી પૂછપરછ કાર્યવાહી હાથ ધરવામાં આવી હતી. આ મોટી રેઈડ બાદ પોલીસ દ્વારા દારૂ ભરેલી ટ્રક જપ્ત કરી ટ્રક ચાલકની અટકાયત કરી ઢસા પોલીસ સ્ટેશન લાવી કોનો દારૂ હોવાનુ અને કયા ઉતારવાનો હોવા સહિત દારૂ સંબંધી જીણવટ ભરી તપાસ કાર્યવાહી હાથધરી હતી. ત્રણ દિવસ અગાઉ પણ ભાવનગરમાંથી દારૂ સાથે બે ઝડપાયા ભાવનગર વેળાવદર (સનેસ) પોલીસ સ્ટાફનાં માણસો મત વિસ્તારમાં પેટ્રોલીંગમાં હતાં. તે દરમિયાન બાતમી મળેલ કે, એક ધોલેરાથી ભાવનગર તરફ એક સિલ્વર કલરની અલ્ટો ગાડી ફોર વ્હીલ કાર રજી. નં. GJ-10-AP-7694 માં પરપ્રાંતિય ઇંગ્લીશ દારૂનો જથ્થો ભરી વેચાણ અર્થે ભાવનગર તરફ લઇને આવે છે. જે બાતમી આધારે ભાવનગર-અમદાવાદ રોડ ઉપર આવેલ અધેળાઈ ભડભીડ રોડ ત્રણ નંબરની ખાડીના પુલ પાસેથી રોડ ઉપર વોચમાં રહેતાં કારમાં ભરેલ ભારતીય બનાવટનાં ઇંગ્લીશ દારૂની જ્હોન વિહસ્કી તથા સ્કોટલેન્ડ ગ્રોરજીસ લખેલ કંપની સીલપેક બોટલો મળી આવી હતી.