Bhavnagar યુનિવર્સિટી કેમ્પસ બન્યું અખાડો! જાહેરમાં યુવકને ઢોર માર મારતો વીડિયો વાયરલ થતાં ચકચાર

ભાવનગર યુનિવર્સિટી કેમ્પસમાંથી કાયદો અને વ્યવસ્થાની સ્થિતિ સામે ગંભીર પ્રશ્નો ઉભા કરતી એક ચોંકાવનારી ઘટના સામે આવી છે. યુનિવર્સિટીના જાહેર માર્ગ પર કેટલાક શખ્સો દ્વારા એક યુવકને ખુલ્લેઆમ બેરહેમીથી માર મારવામાં આવ્યો હોવાની ઘટનાનો વીડિયો સોશિયલ મીડિયા પર વાયરલ થયો છે. શિક્ષણનું ધામ ગણાતા યુનિવર્સિટી કેમ્પસમાં દિવસે-દિવસે અસામાજિક તત્વોનો ત્રાસ વધી રહ્યો છે, જેના કારણે સામાન્ય વિદ્યાર્થીઓ અને નાગરિકોની સુરક્ષા સામે મોટો ખતરો ઊભો થયો છે.

પોલીસ પેટ્રોલિંગના અભાવ અંગે ઉઠ્યા સવાલો

આ ઘટના સામે આવ્યા બાદ સ્થાનિક સ્તરે અનેક પ્રકારની ચર્ચાઓ શરૂ થઈ ગઈ છે. યુનિવર્સિટી વિસ્તારમાં અવારનવાર બનતી આવી અસામાજિક ઘટનાઓ પાછળ પોલીસ પેટ્રોલિંગનો સંપૂર્ણ અભાવ જવાબદાર હોવાના આક્ષેપો થઈ રહ્યા છે. યુનિવર્સિટી જેવા સંવેદનશીલ અને શૈક્ષણિક સંકુલમાં જો આ પ્રકારે જાહેરમાં મારામારી થતી હોય તો સામાન્ય જનજીવનની સુરક્ષા કેટલી સલામત છે તે મોટો પ્રશ્ન છે. સોશિયલ મીડિયા પર આ વીડિયો વાયરલ થયા બાદ જાગૃત નાગરિકો દ્વારા તંત્ર સામે કડક કાર્યવાહી કરવાની માંગ ઉઠી છે.

વીડિયોની સત્યતા અંગે હજુ પુષ્ટિ કરાઈ નથી

જોકે, આ વાયરલ થયેલા વીડિયો અંગે એ વાત પણ સામે આવી છે કે હજી સુધી આ વીડિયોની સત્તાવાર સત્યતા કે તારીખ અંગે કોઈ પુષ્ટિ કરવામાં આવી નથી. આ ઘટના ક્યારે બની અને તેમાં સામેલ યુવકો કોણ હતા તેની સ્પષ્ટતા હજુ બાકી છે. આ મામલે યુનિવર્સિટી સત્તાધીશો અને સ્થાનિક પોલીસ દ્વારા વીડિયોના આધારે તપાસના ચક્રો ગતિમાન કરવામાં આવ્યા છે, જેથી સમગ્ર હકીકત બહાર આવી શકે અને દોષિતો સામે કાયદેસરના પગલાં ભરી શકાય.

આ પણ વાંચો : Valsad News : વેજલપુરમાં અરેરાટી ફેલાવતી ઘટના; ખુલ્લા પ્લોટમાંથી બાળકનું માથું મળતા પોલીસ તપાસમાં લાગી...