Bhavnagar : બોરડીગેટની જવાહર કોલોનીમાં અશાંતધારા વિના મિલકત વેચાણના આક્ષેપ, ટાયરો સળગાવી વિરોધ

ભાવનગર શહેરના બોરડીગેટ વિસ્તારમાં આવેલી જવાહર કોલોની ખાતે અશાંતધારાના કાયદા હેઠળ મિલકતોના વેચાણને લઈને સ્થાનિક રહીશોમાં ઉગ્ર વિરોધ અને ભારે આક્રોશ ફાટી નીકળ્યો છે. આ વિસ્તારમાં તંત્રની સત્તાવાર મંજૂરી વિના જ પ્રોપર્ટીનું ગેરકાયદે વેચાણ કરવામાં આવી રહ્યું હોવાના આક્ષેપ સાથે મહિલાઓ સહિત મોટી સંખ્યામાં સ્થાનિક નાગરિકો રસ્તા પર ઉતરી આવ્યા હતા.

અશાંતધારાની મંજૂરી ના લીધી હોવાનો આરોપ

બોરડીગેટ વિસ્તારમાં સર્જાયેલા આ વિવાદ દરમિયાન ઘટનાસ્થળે ચાલી રહેલું જેસીબી મશીનનું કામ પણ વિરોધ કરી રહેલા સ્થાનિક લોકોએ તાત્કાલિક અટકાવી દીધું હતું. રોષે ભરાયેલા નાગરિકોએ કામ બંધ કરાવીને જેસીબીને સ્થળ પરથી બહાર કઢાવ્યું હતું. સ્થાનિક રહીશો અને રજૂઆતકર્તાઓનો સ્પષ્ટ દાવો છે કે છેલ્લા ઘણા સમયગાળા દરમિયાન આ વિસ્તારમાં અશાંતધારાની કોઈ પણ પ્રકારની કાયદેસર મંજૂરી લીધા વગર જ 4 થી 5 જેટલી રહેણાંક પ્રોપર્ટીઓનું વેચાણ કરી દેવામાં આવ્યું છે. આ પ્રકારના વ્યવહારોના કારણે સમગ્ર વિસ્તારમાં સામાજિક અસંતોષ ફેલાયો છે.

સત્તાવાર દસ્તાવેજ વગર જ કેટલાક લોકો રહેવા માટે આવી ગયા

વિરોધ દર્શાવતા સ્થાનિક લોકોએ વધુમાં એવો પણ ગંભીર આક્ષેપ કર્યો છે કે પંકજ સોસાયટીના પ્લોટ નંબર 20માં કોઈપણ સત્તાવાર દસ્તાવેજ વગર જ કેટલાક લોકો રહેવા માટે આવી ગયા છે. નિયમ મુજબ અશાંતધારો લાગુ હોય તેવા વિસ્તારોમાં મિલકતની ખરીદ-વેચાણ માટે વહીવટી તંત્રની પૂર્વમંજૂરી મેળવવી ફરજિયાત હોય છે, છતાં કોઈપણ કાયદેસર દસ્તાવેજ વિના લોકો વસવાટ કરવા આવી જતાં રહીશોમાં ભારે નારાજગી ફેલાઈ છે. સ્થાનિકોનું કહેવું છે કે આવા વ્યવહારો સામે યોગ્ય તપાસ થવી જરૂરી છે.લડતને ગાંધીનગર સુધી લંબાવવામાં આવશે

આ સમગ્ર મામલે સ્થાનિક રહીશો દ્વારા ભાવનગર જિલ્લા કલેક્ટર તેમજ જિલ્લા પોલીસ વડા (એસપી)ને લેખિતમાં રજૂઆત કરવામાં આવી છે. આ લેખિત રજૂઆતમાં અશાંતધારાની મંજૂરી વગર થયેલા મિલકતોના સોદાઓની તપાસ કરીને કડક કાનૂની કાર્યવાહી કરવાની માંગણી કરવામાં આવી છે. સ્થાનિકોએ સ્પષ્ટ ચીમકી આપી છે કે જો આ બાબતે તાત્કાલિક પગલાં લેવામાં નહીં આવે, તો સ્થાનિક સ્તરેથી શરૂ થયેલી આ લડતને ગાંધીનગર સુધી લંબાવવામાં આવશે. 

આ પણ વાંચો  :  Sandesh Digital Explainer : વોટની સાથે નોટની પણ લડાઈ, અમેરિકાની ચૂંટણીમાં અબજોપતિઓનું કરોડોનું દાન, વાંચો રસપ્રદ માહિતી