Bhavnagar News: પાલીતાણાના વડીયા નજીક કાળમુખો અકસ્માત નડતાં શિક્ષકનું ઘટનાસ્થળે જ કરુણ મોત

ભાવનગર જિલ્લાના પાલીતાણા વિસ્તારમાં એક ગમખ્વાર અકસ્માતની ઘટના સામે આવી છે. પાલીતાણાના વડીયા ગામ નજીકથી પસાર થઈ રહેલા એક બાઈક સવાર શિક્ષકને અકસ્માત નડ્યો હતો. આ અકસ્માત એટલો ભયાનક હતો કે બાઈક ચલાવી રહેલા શિક્ષકનું ઘટનાસ્થળે જ કરુણ મોત નીપજ્યું હતું. ધોળા દિવસે બનેલી આ અકસ્માતની ઘટનાને પગલે આસપાસના સ્થાનિક લોકો તાત્કાલિક મદદ માટે દોડી આવ્યા હતા.

બાઈક સવારનું ઘટનાસ્થળે જ કમકમાટીભર્યું મૃત્યુ

આ અકસ્માતમાં મૃત્યુ પામનાર વ્યક્તિ વ્યવસાએ શિક્ષક હતા. તેમનું નામ અશ્વિનભાઈ ચાવડા હતું. તેઓ પોતાના મોટરસાયકલ પર સવાર થઈને જઈ રહ્યા હતા તે દરમિયાન વડીયા નજીક આ કાળમુખો અકસ્માત સર્જાયો હતો. અકસ્માતમાં ગંભીર ઈજાઓ થવાના કારણે અશ્વિનભાઈએ સ્થળ પર જ દમ તોડી દીધો હતો. એક કર્મનિષ્ઠ શિક્ષકના અકાળે અવસાનના સમાચાર વહેતા થતાં જ સમગ્ર પંથકના શિક્ષણ આલમમાં ભારે શોકનું મોજું ફરી વળ્યું છે.

મૃતદેહને પોસ્ટમોર્ટમ અર્થે ખસેડી પોલીસે તપાસ શરૂ કરી

પોલીસે મૃતક શિક્ષક અશ્વિનભાઈના મૃતદેહને કબજે કરીને પંચનામું કર્યા બાદ પોસ્ટમોર્ટમની પ્રક્રિયા માટે નજીકની સરકારી હોસ્પિટલમાં ખસેડ્યો છે. આ અકસ્માત કયા વાહન સાથે અને કેવી પરિસ્થિતિમાં સર્જાયો તે અંગેની સાચી માહિતી મેળવવા માટે પોલીસે અકસ્માતનો ગુનો નોંધીને સમગ્ર મામલે કાયદેસરની તપાસ હાથ ધરી છે.

ગુજરાતના વધુ સમાચાર વાંચવા માટે ક્લિક કરો