Bharuchના અંકલેશ્વરમાં ધોરણ 12ની બે સગી બહેનો પર સ્કૂલના ઝઘડાની અદાવતમાં હુમલો, સમગ્ર ઘટના CCTVમાં કેદ

ભરૂચ જિલ્લાના અંકલેશ્વર જીઆઈડીસી વિસ્તારમાંથી એક ચોંકાવનારી અને ચિંતાજનક ઘટના સામે આવી છે. અહીં ધોરણ 12માં અભ્યાસ કરતી બે સગી બહેનો જ્યારે પોતાની મોપેડ પર સવાર થઈને જઈ રહી હતી, ત્યારે રસ્તામાં તેમને આંતરીને તેમના પર હિંચકારો હુમલો કરવામાં આવ્યો હતો. સ્કૂલની અંદર ચાલી રહેલા સામાન્ય ઝઘડાએ આવું ઉગ્ર સ્વરૂપ ધારણ કરી લેતા સ્થાનિકો અને વાલીઓમાં ભારે રોષ જોવા મળી રહ્યો છે.

વિદ્યાર્થીની, માતા-પિતા અને દાદી સાથે મળીને કર્યો હુમલો

શાળામાં અભ્યાસ કરતી અન્ય એક વિદ્યાર્થીની સાથે આ બહેનોને કોઈ બાબતે ઝઘડો થયો હતો. આ બાબતની અદાવત રાખીને તે વિદ્યાર્થીનીએ પોતાના પરિવારને આમાં સામેલ કર્યો હતો. વિદ્યાર્થીનીએ તેના માતા, પિતા અને દાદી સાથે મળીને રસ્તા વચ્ચે આ બંને બહેનોને ઘેરી લીધી હતી અને તેમના પર તૂટી પડ્યા હતા. આ સમગ્ર હિંસક હુમલાની ઘટના નજીકમાં લાગેલા સીસીટીવી (CCTV) કેમેરામાં કેદ થઈ ગઈ છે, જેના ફૂટેજ પણ હવે બહાર આવ્યા છે.

અંકલેશ્વર જીઆઇડીસી પોલીસે તપાસ શરૂ કરી

આ સામૂહિક હુમલામાં બંને બહેનોને નાની-મોટી ઈજાઓ પહોંચતા તેમને તાત્કાલિક નજીકની હોસ્પિટલમાં સારવાર અર્થે ખસેડવામાં આવી છે. ઘટનાની જાણ થતાં જ અંકલેશ્વર જીઆઈડીસી પોલીસનો કાફલો સક્રિય થયો છે. પોલીસે સીસીટીવી ફૂટેજના આધારે હુમલો કરનાર વિદ્યાર્થીની અને તેના પરિવારજનો વિરુદ્ધ કાયદેસરનો ગુનો નોંધવાની તજવીજ હાથ ધરી છે. ધોળા દિવસે સરેઆમ વિદ્યાર્થીનીઓ પર થયેલા આ હુમલાને પગલે પોલીસે કડક કાર્યવાહીના ચક્રો ગતિમાન કર્યા છે.

ગુજરાતના વધુ સમાચાર વાંચવા માટે ક્લિક કરો