Anandમાં ભારે વરસાદના 'રેડ એલર્ટ' વચ્ચે 1 ઓગસ્ટે તમામ શાળા-કોલેજોમાં રજા જાહેર, જિલ્લા મેજિસ્ટ્રેટનો આદેશ

આણંદ જિલ્લામાં હવામાન વિભાગ દ્વારા ભારેથી અતિભારે વરસાદની આગાહી સાથે 'રેડ એલર્ટ' આપવામાં આવ્યું છે. આ પરિસ્થિતિને ધ્યાનમાં રાખીને જિલ્લા વહીવટી તંત્ર દ્વારા 1 ઓગસ્ટ, શનિવારના રોજ જિલ્લાની તમામ શૈક્ષણિક સંસ્થાઓમાં રજા જાહેર કરવામાં આવી છે. આંગણવાડીથી લઈને પ્રાથમિક, માધ્યમિક શાળાઓ તેમજ કોલેજો સુધીનું તમામ શૈક્ષણિક કાર્ય સંપૂર્ણપણે બંધ રાખવાનો નિર્ણય લેવામાં આવ્યો છે.

જિલ્લા મેજિસ્ટ્રેટે બહાર પાડ્યું જાહેરનામું

ભારે વરસાદની સ્થિતિમાં વિદ્યાર્થીઓની સુરક્ષા અને સલામતીને પ્રાથમિકતા આપતાં જિલ્લા મેજિસ્ટ્રેટ પ્રવીણ ચૌધરી દ્વારા આ અંગેનું સત્તાવાર જાહેરનામું પ્રસિદ્ધ કરવામાં આવ્યું છે. આ આદેશ સમગ્ર આણંદ જિલ્લાના તમામ તાલુકાઓમાં એકસમાન રીતે અમલી રહેશે. વહીવટી તંત્ર દ્વારા સ્પષ્ટ ચેતવણી આપવામાં આવી છે કે જો કોઈ શૈક્ષણિક સંસ્થા આ જાહેરનામાનું ઉલ્લંઘન કરશે તો તેની સામે કાયદેસરની સખત કાર્યવાહી કરવામાં આવશે.

વાલીઓ અને વિદ્યાર્થીઓને સતર્ક રહેવા અપીલ

હવામાન વિભાગની તીવ્ર વરસાદની આગાહીને પગલે જિલ્લા વહીવટી તંત્ર દ્વારા વાલીઓ અને વિદ્યાર્થીઓને બિનજરૂરી બહાર ન નીકળવા અને સતર્ક રહેવા અપીલ કરવામાં આવી છે. અનરાધાર વરસાદના કારણે રસ્તાઓ પર પાણી ભરાવાની કે અન્ય કોઈ આપાતકાલીન સ્થિતિ સર્જાય તો બાળકોની સુરક્ષા જોખમાય નહીં તે માટે આ પૂર્વતૈયારીના ભાગરૂપે નિર્ણય લેવાયો છે.

ગુજરાતના વધુ સમાચાર વાંચવા માટે ક્લિક કરો