Amreli: ખાંભાના ચતુરી ગામે દાદાની નજર સામેથી 5 વર્ષના માસૂમ બાળકને સિંહણ ઉઠાવી ગઈ

અમરેલી જિલ્લાના ગ્રામ્ય વિસ્તારોમાં હવે સિંહો અને સિંહણો માનવભક્ષી બની રહ્યા હોય તેવા ચિંતાજનક લાઈવ પુરાવા મળી રહ્યા છે. ખાંભા તાલુકાના ચતુરી ગામે આજે વહેલી સવારે એક એવી કમકમાટીભરી ઘટના બની છે જેને સાંભળીને કોઈ પણ માતા-પિતાનું કાળજું ધ્રુજી ઉઠે. ગામના સીમ વિસ્તાર અને રહેણાંકની નજીકથી ૫ વર્ષનો માસૂમ જીયાન દેવકુંભાઈ સીધા પોતાના દાદાની આંગળી પકડીને સામાન્ય રીતે ચાલીને જઈ રહ્યો હતો. આ દરમિયાન ઝાડીઓમાં મોકો જોઈને છુપાઈને બેઠેલી એક સિંહણે અચાનક ત્રાટક મારી હતી અને દાદા કંઈ સમજે તે પહેલા જ 5 વર્ષના જીયાનને ગળાના ભાગેથી પકડીને સીધી ઝાડીઓ તરફ ખેંચી ગઈ હતી.

દાદા નજર સામે જોતા રહ્યા અને સિંહણ શિકાર કરી ગઈ

બાળકના દાદાએ પોતાના પૌત્રને સિંહણના મોંમાંથી બચાવવા માટે બૂમાબૂમ કરી હતી અને પાછળ દોડ્યા હતા, પરંતુ સિંહણ પળવારમાં માસૂમ બાળકને લઈને ગીચ જંગલ અને ઝાડીઓ તરફ ગાયબ થઈ ગઈ હતી. આ લાઈવ હોનારતની જાણ થતાં જ આખું ચતુરી ગામ લાકડીઓ અને હથિયારો સાથે ઘટનાસ્થળે દોડી આવ્યું હતું અને ખાંભા વન વિભાગને ઇમરજન્સી એલર્ટ મોકલવામાં આવ્યો હતો. વન વિભાગનો મોટો કાફલો શૂટર અને ટ્રેકર્સ સાથે ચતુરી ગામે પહોંચ્યો છે અને લોહીના નિશાન તેમજ સિંહણના પગેરાના આધારે માસૂમ જીયાનની શોધખોળ લાઈવ શરૂ કરી છે.

અમરેલી જિલ્લામાં જનતા ભયના ઓથાર હેઠળ

સ્થાનિક અહેવાલો મુજબ, અમરેલી જિલ્લામાં સિંહ અને દીપડા દ્વારા માનવો પર હુમલો કરવાની ઘટનાઓ ચિંતાજનક હદે વધી ગઈ છે. છેલ્લા એક જ મહિનામાં સિંહના હુમલાની આ ત્રીજી મોટી ઘટના છે. હજુ થોડા દિવસો પહેલા જ રાજુલા તાલુકાના કોવાયા ગામ નજીક આવેલી અલ્ટ્રાટેક ખાનગી કંપનીની કોલોની પંથકમાં એક સિંહે ઘૂસીને એક આશાસ્પદ યુવાન પર હુમલો કરી તેને મોતને ઘાટ ઉતાર્યો હતો. આ ઘટનાની શાહી હજુ સુકાઈ નથી ત્યાં ખાંભામાં 5 વર્ષના બાળકને સિંહણ ઉઠાવી ગઈ છે. વારંવાર બનતી આ ઘટનાઓના કારણે અમરેલી, ખાંભા, સાવરકુંડલા અને રાજુલાના ગ્રામ્ય વિસ્તારોમાં સાંજના 7 વાગ્યા પછી લોકો બહાર નીકળતા ડરી રહ્યા છે. સીમમાં જતા ખેડૂતો અને મજૂરોના જીવ પણ અધ્ધર થઈ ગયા છે. વન વિભાગ તાત્કાલિક આ સિંહણને પાંજરે પૂરી 'માનવભક્ષી' જાહેર કરે તેવી લોકમાગ ઉઠી છે.

આ પણ વાંચો: Himmatnagar: બાઇક સવાર પોલીસકર્મીને અડફેટે લઈ કાર ચાલક ફરાર, માથામાં ગંભીર ઇજા