Ambajiના દાંતામાં ડેન્ગ્યુનો હાહાકાર: વાલ્મિકી મહોલ્લામાં બાળકોમાં વધુ બે કેસ નોંધાતા ફફડાટ

બનાસકાંઠા જિલ્લાના પ્રસિદ્ધ યાત્રાધામ અંબાજી પંથકમાંથી સ્વાસ્થ્યને લઈને એક અત્યંત ચિંતાજનક સમાચાર સામે આવ્યા છે. અંબાજીના દાંતા ખાતે આવેલા વાલ્મિકી મહોલ્લામાં ડેન્ગ્યુના રોગચાળાએ અસળ ભરડો લીધો છે. મહોલ્લામાં અગાઉથી જ 6થી 7 બાળકો ડેન્ગ્યુની ઝપેટમાં હોવાનું સામે આવ્યું હતું, ત્યારે તહેવારોના આ માહોલ વચ્ચે બાળકોમાં વધુ બે નવા કેસ સામે આવતા સમગ્ર વિસ્તારમાં ભારે ફફડાટ અને ગભરાટનો માહોલ વ્યાપી ગયો છે.

ખાનગી હોસ્પિટલમાં બાળકો સારવાર હેઠળ

પ્રાપ્ત વિગતો અનુસાર વાલ્મિકી મહોલ્લામાં અગાઉ અનેક બાળકો બીમાર પડ્યા હતા અને હવે નવા બે બાળકોના રિપોર્ટ પોઝિટિવ આવતા તેમને તાત્કાલિક ધોરણે વધુ અને ઉચ્ચ સારવાર માટે પાલનપુરની ખાનગી હોસ્પિટલોમાં ખસેડવામાં આવ્યા છે. સ્થાનિકોમાં એવી પણ પ્રબળ આશંકા વ્યક્ત કરવામાં આવી રહી છે કે જો સમયસર યોગ્ય પગલાં નહીં ભરવામાં આવે તો મહોલ્લાના અન્ય બાળકો પણ આ જીવલેણ રોગની ઝપેટમાં આવી શકે છે.

દવા અને ધુમાડાના છંટકાવ છતાં નવા કેસ

આરોગ્ય વિભાગ દ્વારા અગાઉ મહોલ્લામાં દવા અને ધુમાડાનો છંટકાવ કરવામાં આવ્યો હોવાના દાવા કરવામાં આવ્યા હતા, પરંતુ તેમ છતાં સતત નવા કેસો સામે આવતા તંત્રની કામગીરી સામે ગંભીર સવાલો ઊભા થયા છે. દિવાળીના પવિત્ર તહેવારો વચ્ચે આ પ્રકારની ગંભીર બીમારી ફેલાવાથી અસરગ્રસ્ત પરિવારોમાં ખુશીની જગ્યાએ ચિંતા અને શોકનું મોજું ફરી વળ્યું છે. સ્થાનિક નાગરિકો દ્વારા આરોગ્ય વિભાગ ત્વરિત હસ્તક્ષેપ કરીને સમગ્ર વિસ્તારમાં સઘન સર્વે, બ્લડ ટેસ્ટ અને ફોગિંગની કામગીરી સઘન બનાવવામાં આવે તેવી ઉગ્ર માંગ કરવામાં આવી છે.

ગુજરાતના વધુ સમાચાર વાંચવા માટે ક્લિક કરો