Ahmedabad સિવિલમાં 233મું અંગદાન: 22 વર્ષીય બ્રેઇનડેડ યુવાનના અંગોથી ત્રણ વ્યક્તિઓને મળ્યું નવું જીવન

માનવતાના ઉત્તમ ઉદાહરણ સમાન અંગદાનની સરવાણી અમદાવાદ સિવિલ હોસ્પિટલમાં અવિરત વહી રહી છે. સિવિલ હોસ્પિટલમાં આજે 233મું અંગદાન સફળતાપૂર્વક સંપન્ન થયું છે. ભાવનગરના વતની એવા માત્ર 22 વર્ષીય બ્રેઇનડેડ યુવાનના પરિવારે દુઃખની ઘડીમાં પણ હિંમત દાખવી અંગદાનનો નિર્ણય લેતા ત્રણ જરૂરિયાતમંદ દર્દીઓને નવું જીવન મળ્યું છે.

22 વર્ષીય બ્રેઇનડેડ યુવાનના અંગોનું દાન

ભાવનગરના આ યુવાનને ગંભીર ઈજાઓ બાદ અમદાવાદ સિવિલ હોસ્પિટલ ખાતે સારવાર અર્થે ખસેડવામાં આવ્યો હતો. જોકે, તબીબોના અથાગ પ્રયત્નો છતાં તેને બચાવી શકાયો નહોતો અને તેને 'બ્રેઇનડેડ' જાહેર કરવામાં આવ્યો હતો. સિવિલ હોસ્પિટલની ઓર્ગન રિટ્રાઇવલ ટીમ દ્વારા કાઉન્સિલિંગ કરવામાં આવતા યુવાનના પરિવારે અંગદાન માટે સંમતિ આપી હતી.

એક લીવર અને બે કિડની દ્વારા ત્રણ જીવ બચાવ્યા

આ અંગદાનમાં યુવાનના શરીરમાંથી એક લીવર અને બે કિડની મેળવવામાં આવી હતી. આ ત્રણેય અંગોને ગ્રીન કોરિડોર મારફતે જરૂરિયાતમંદ દર્દીઓમાં ટ્રાન્સપ્લાન્ટ કરી તેમને નવજીવન બક્ષવામાં આવ્યું છે. ઉલ્લેખનીય છે કે, સિવિલ હોસ્પિટલના સુપરિન્ટેન્ડન્ટ અને તેમની ટીમની મહેનતને કારણે ગુજરાત આજે અંગદાન ક્ષેત્રે દેશભરમાં અગ્રેસર રહ્યું છે. 22 વર્ષની નાની ઉંમરે વિદાય લેતા યુવાને જતા-જતા ત્રણ લોકોના ઘરમાં ખુશીઓના દીવા પ્રગટાવ્યા છે.

ગુજરાતના વધુ સમાચાર વાંચવા માટે ક્લિક કરો