Ahmedabad News : શ્રાવણ માસ આવતા જ AMC નું આરોગ્ય તંત્ર સફાળું જાગ્યું, ફૂડ વિક્રેતાઓના ત્યાં પાડ્યા દરોડા

અમદાવાદ મહાનગરપાલિકા (AMC) ના આરોગ્ય વિભાગ દ્વારા શહેરમાં ખાદ્ય પદાર્થોની ગુણવત્તા અને સ્વચ્છતા સુનિશ્ચિત કરવા માટે છેલ્લા એક સપ્તાહથી સઘન ડ્રાઈવ ચલાવવામાં આવી રહી છે. આ ઝુંબેશ અંતર્ગત અનેક એકમો સામે કડક કાર્યવાહી કરવામાં આવી છે.

છેલ્લા 1 સપ્તાહમાં 1,045 એકમમાં કરી તપાસ

છેલ્લા એક સપ્તાહમાં AMC ના આરોગ્ય વિભાગની ટીમો દ્વારા 1,045 એકમોમાં તપાસ હાથ ધરવામાં આવી હતી, જેમાં રેસ્ટોરન્ટ, ખાણી-પીણીની દુકાનો, ફરસાણની દુકાનો અને અન્ય ખાદ્ય ઉત્પાદન એકમોનો સમાવેશ થાય છે. આ તપાસ દરમિયાન, નિયમોનું ઉલ્લંઘન કરનારા અને અસ્વચ્છતા ધરાવતા એકમો સામે કડક પગલાં લેવામાં આવ્યા છે. ડ્રાઈવના ભાગરૂપે 7 એકમોને સીલ કરવામાં આવ્યા છે જ્યારે 414 એકમોને નોટિસ ફટકારવામાં આવી છે.

1,300 કિલોથી વધારે અખાદ્ય પદાર્થનો નાશ

આ ઉપરાંત, ગ્રાહકોના સ્વાસ્થ્ય માટે જોખમી એવા 1,300 કિલોથી વધુ અખાદ્ય પદાર્થોનો નાશ કરવામાં આવ્યો છે. આ પદાર્થોમાં વાસી ખોરાક, નબળી ગુણવત્તાવાળી સામગ્રી અને આરોગ્યપ્રદ ન હોય તેવી વસ્તુઓનો સમાવેશ થાય છે. આ સઘન કાર્યવાહીના ભાગરૂપે, AMC ના આરોગ્ય વિભાગ દ્વારા નિયમોનું ઉલ્લંઘન કરનારા એકમો પાસેથી રૂપિયા 12.86 લાખથી વધુનો દંડ પણ વસૂલવામાં આવ્યો છે. AMC ની આ ડ્રાઈવનો મુખ્ય હેતુ નાગરિકોને શુદ્ધ અને સ્વચ્છ ખાદ્ય પદાર્થો મળી રહે તે સુનિશ્ચિત કરવાનો છે.