Ahmedabad News: ધોળકા વૌઠાનો ઐતિહાસિક મેળો, જાણો તારીખ અને મુખ્ય આકર્ષણો

અમદાવાદ ગ્રામ્યના ધોળકા નજીક આવેલા વૌઠા ગામે સાત નદીઓના પવિત્ર સંગમ સ્થાને યોજાનારા ઐતિહાસિક અને લોકપ્રિય વૌઠાના મેળા માટે વહીવટી તંત્ર અને ગ્રામ પંચાયત દ્વારા તડામાર તૈયારીઓને આખરી ઓપ આપવામાં આવી રહ્યો છે. આસ્થા, પરંપરા અને વેપારના આ ત્રિવેણી સંગમ સમાન મેળામાં લાખોની સંખ્યામાં શ્રદ્ધાળુઓ અને પ્રવાસીઓ ઉમટવાની શક્યતા છે.

સાત નદીઓનો પવિત્ર સંગમ અને તારીખો

આગામી 20થી 25 નવેમ્બર સુધી છ દિવસ સુધી વૌઠાના મેળાની અદભુત રોનક જામશે. ધોળકા નજીક સાબરમતી, ખારી, મેશ્વો, વાત્રક, શેઢી, માઝુમ અને હાથમતી એમ કુલ સાત નદીઓનો પવિત્ર સંગમ થાય છે. આ પવિત્ર સ્થળે ચકલેશ્વર મહાદેવના દર્શન કરવા અને પવિત્ર સ્નાન કરવા માટે દૂર-દૂરથી લાખો શ્રદ્ધાળુઓ આવે છે.

ગધેડાનું વિશાળ લે-વેચ બજાર અને આકર્ષણો

વૌઠાનો મેળો મુખ્યત્વે પ્રાણીઓના લે-વેચના મેળા તરીકે સમગ્ર દેશમાં પ્રખ્યાત છે, જેમાં પણ ખાસ કરીને 'ગધેડાના લે-વેચનું વિશાળ બજાર' આ મેળાનું સૌથી મોટું અને મુખ્ય આકર્ષણ રહે છે. આ ઉપરાંત મેળામાં ચકડોળ, બ્રેકડાન્સ, મોતનો કૂવો સહિતની અનેક રોમાંચક મનોરંજન રાઈડ્સ તેમજ ખાણીપીણીના અસંખ્ય સ્ટોલ્સ ઊભા કરવામાં આવશે.

વહીવટી તંત્ર દ્વારા સુરક્ષા અને વ્યવસ્થાઓ

મેળાના આયોજન અંતર્ગત સ્ટોલ અને પ્લોટની હરાજી થકી અંદાજે રૂ. 2.80 કરોડની આર્થિક આવક થવાનો અંદાજ છે. વૌઠા ગ્રામ પંચાયત અને જિલ્લા વહીવટી તંત્ર દ્વારા આવનારા શ્રદ્ધાળુઓની સુરક્ષા, સ્વચ્છતા અને પીવાના પાણીની ઉત્તમ વ્યવસ્થાઓ સુનિશ્ચિત કરવામાં આવી રહી છે, જેથી મેળો સફળ અને સુરક્ષિત રીતે સંપન્ન થઈ શકે.

આ પણ વાંચો: Ahmedabad: ચાંદખેડા ભાજપમાં આંતરિક વિખવાદ ખુલીને સામે આવ્યો; વોર્ડ અને SC મોરચાનું અલગ-અલગ સ્નેહમિલન