Ahmedabad News: કઠવાડામાં સગીરાએ વાત કરવાની ના પાડતા યુવકનો પરિવાર પર હુમલો

કઠવાડા વિસ્તારમાં રહેતી એક સગીરાને લગ્નનું દબાણ કરી તેના મિત્રે પરિવાર સાથે ઝઘડો કહ્યો હતો. સગીરાથી દૂર રહેવાનું કહેતા અદાવત રાખી યુવક અને તેના પરિવારે સગીરાના ઘરમાં ઘૂસીને સગીરાના માતા-પિતા અને મોટાબાપાને ચપ્પુ બતાવી માર મારી ધમકી આપી હતી. જેથી સગીરાના માતાએ ચાર લોકો સામે ફરિયાદ નોધાવી છે.

કઠવાડામાં રહી છૂટક મજૂરી કરતા એક મહિલાની 14 વર્ષની પુત્રી સાથે એક યુવકે મિત્રતા કરી હતી. બાદમાં બંને વચ્ચેની વાતોચીતો વધતા સગીરાની માતાને સમજાવતા સગીરાએ તે યુવક સાથે વાત કરવાનું બંધ કર્યુ હતુ. જે બાદ યુવક જ્યારે સગીરા સ્કુલે જાય ત્યારે તેની સાથે વાત કરવા દબાણ કરતો હતો અને હેરાન કરતો હતો. જે અંગે સગીરાની માતાએ યુવકના માતા-પિતાને જાણ કરી હતી. ગત 9 જુલાઇએ મહિલા અને તેની પુત્રી ઘરે હતા તે સમયે યુવક તેના પરિવાર સાથે મહિલાના ઘરમાં ઘૂસી સગીરાની છેડતી કરી ઉપરાંત યુવકના પરિવારજનોએ મહિલાને તેમજ સગીરાના પરિવારજનોને ચપ્પુ બતાવી માર માર્યો હતો. બૂમાબૂમ કરતા આસપાસના લોકોએ વચ્ચે પડી તેમને છોડાવ્યા હતા. જે બાદ યુવકે સગીરાના મારી સાથે લગ્ન નહિ કરાવો તો બધાને જાનથી મારી નાખીશ અને એટ્રોસિટીના કેસમાં જેલમાં પુરાવી દઇશ તેવી ધમકી આપી જતા રહ્યા હતા. જ્યારે ઇજાગ્રસ્ત સગીરાના પિતા અને મોટાબાપાને સારવાર અર્થે હોસ્પિટલમાં લઇ જવામાં આવ્યા હતા. આ અંગે મહિલાએ યુવક અને તેના પરિવારજનો સામે નિકોલ પોલીસ સ્ટેશનમાં ફરિયાદ નોધાવી છે.