Ahmedabad: AMCમાં 'ફાઈલ' જ સુરક્ષિત નથી: સોલિડ વેસ્ટ વિભાગની ટેન્ડર ફાઈલ ગુમ થતા મ્યુનિ. તંત્રમાં દોડધામ

અમદાવાદ મ્યુનિસિપલ કોર્પોરેશન (AMC) પોતાની હાઈટેક સિસ્ટમ અને ડિજિટાઈઝેશનના દાવા કરે છે, પરંતુ વાસ્તવિકતા કંઈક અલગ જ હોય તેવું લાગી રહ્યું છે. તાજેતરમાં AMCના ઉત્તર ઝોનના સોલિડ વેસ્ટ વિભાગની એક અત્યંત મહત્વની ટેન્ડર ફાઈલ ગુમ થઈ હોવાની ઘટના સામે આવતા તંત્રમાં ફફડાટ વ્યાપી ગયો છે.

શોધખોળ છતાં ફાઈલનો પત્તો નથી

મળતી માહિતી મુજબ, સોલિડ વેસ્ટ વિભાગની એક ટેન્ડર પ્રક્રિયાને લગતી ફાઈલ લાંબા સમયથી મળી રહી નથી. ઓફિસના તમામ રેકોર્ડ અને કબાટો ફંફોસી નાખ્યા હોવા છતાં આ ફાઈલનો કોઈ પત્તો લાગ્યો નથી. ટેન્ડર પ્રક્રિયામાં લાખો-કરોડોના ખર્ચની વિગતો હોવાથી આ ફાઈલ ગુમ થવી એ કોઈ મોટા કૌભાંડને છુપાવવાની કોશિશ છે કે પછી તંત્રની ઘોર બેદરકારી, તેવા સવાલો ઉઠી રહ્યા છે.

તમામ ખાતાના વડાઓને પત્ર લખાયો

ફાઈલ ન મળતા આખરે ઉત્તર ઝોન દ્વારા એક અનોખો માર્ગ અપનાવવામાં આવ્યો છે. ઝોન દ્વારા કોર્પોરેશનના તમામ ખાતાના વડાઓને સત્તાવાર પત્ર લખીને જાણ કરવામાં આવી છે કે, "જો સોલિડ વેસ્ટ વિભાગની આ ફાઈલ ભૂલથી તમારા વિભાગમાં આવી ગઈ હોય, તો તેને સત્વરે પરત મોકલી આપવી."

આ પણ વાંચો: Banaskantha: પાલનપુર-અંબાજી હાઈવે પરથી શ્રમિકના બાળકનું અપહરણ, પોલીસે ટેકનિકલ સર્વેલન્સની મદદથી માસૂમને ઉગાર્યો