Ahmedabad: શહેરની પ્રતિષ્ઠિત શાળાઓને બોમ્બથી ઉડાવી દેવાની ધમકી! સીએન વિદ્યાલય સહિત 3 સ્કૂલોમાં દોડધામ

અમદાવાદ શહેરના અત્યંત પોશ અને ધમધમતા એવા પશ્ચિમ વિસ્તારમાં આવેલી પ્રતિષ્ઠિત શાળાઓને નિશાન બનાવીને બોમ્બ બ્લાસ્ટ કરવાની ગંભીર ધમકી મળતાં સમગ્ર શહેરમાં સનસનાટી મચી ગઈ છે. સેટેલાઇટ અને બોડકદેવ વિસ્તારમાં આવેલી સીએન વિદ્યાલય, વિદ્યાભારતી સ્કૂલ અને નારાયણ ગુરુ સ્કૂલના સત્તાવાર ઈમેઈલ આઈડી પર સ્કૂલ બિલ્ડિંગને વિસ્ફોટકથી ઉડાવી દેવાનો ધમકીભર્યો મેઈલ આવ્યો હતો. ઘટનાની ગંભીરતા જોતાં સ્કૂલ સંચાલકોએ તુરંત જ પોલીસ કંટ્રોલ રૂમને જાણ કરી હતી, જેના પગલે સ્થાનિક પોલીસ, બોમ્બ ડિસ્પોઝલ સ્ક્વોડ (BDDS) અને ડોગ સ્ક્વોડનો મોટો કાફલો ઘટનાસ્થળે દોડી ગયો છે.

સ્કૂલ બિલ્ડિંગ તાત્કાલિક ખાલી કરાવાઈ

ધમકીભર્યો ઈમેઈલ સામે આવતાં જ શાળાઓના સંચાલકોએ કોઈ પણ પ્રકારનું જોખમ લીધા વિના સાવચેતીના ભાગરૂપે તાત્કાલિક તમામ ક્લાસરૂમ અને સમગ્ર સ્કૂલ કેમ્પસ ખાલી કરાવવાનું શરૂ કર્યું હતું.બાળકોમાં ગભરાટ ન ફેલાય તે રીતે શાંતિપૂર્ણ રીતે તમામ વિદ્યાર્થીઓને સુરક્ષિત રીતે ગ્રાઉન્ડ અને બહારના પરિસરમાં લાવવામાં આવ્યા હતા.સ્કૂલ મેનેજમેન્ટ દ્વારા તાબડતોબ વાલીઓને ફોન તેમજ મેસેજ મારફતે જાણ કરીને બાળકોને ઘરે લઈ જવા માટે તાત્કાલિક સ્કૂલે બોલાવવામાં આવ્યા હતા.અચાનક શાળામાંથી મેસેજ મળતાં જ ચિંતિત અને ગભરાયેલા વાલીઓ મોટી સંખ્યામાં સ્કૂલ પરિસરે દોડી આવ્યા હતા, જેના કારણે શાળાની આસપાસ ટ્રાફિક જામના દ્રશ્યો પણ સર્જાયા હતા.

બોમ્બ સ્ક્વોડ અને ડોગ સ્ક્વોડ દ્વારા મેગા સર્ચ ઓપરેશન

માહિતી મળતાની સાથે જ સ્થાનિક પોલીસ મથકના ઉચ્ચ અધિકારીઓ, સાયબર ક્રાઈમ સેલ તેમજ બોમ્બ સ્ક્વોડ અને ડોગ સ્ક્વોડની ટીમો ત્રણેય સ્કૂલો ખાતે પહોંચી ગઈ હતી. દરેક ક્લાસરૂમ, સ્ટાફ રૂમ, વોશરૂમ, પાર્કિંગ, બેગ્સ અને મેદાન સહિતના તમામ ખૂણાઓની મેટલ ડિટેક્ટર અને સ્નિફર ડોગ્સની મદદથી સઘન ચકાસણી હાથ ધરવામાં આવી છે. આ ઈમેઈલ કોઈ અસામાજિક તત્વો દ્વારા ડર ફેલાવવા માટે કરાયેલું 'હોક્સ' (ફેક) કૃત્ય છે કે કોઈ મોટું ષડયંત્ર, તે દિશામાં સાયબર ક્રાઈમ બ્રાન્ચે આઈપી (IP) એડ્રેસ ટ્રેસ કરવાની કવાયત તેજ કરી દીધી છે.

આ પણ વાંચો: Banaskantha: નાયબ મુખ્યમંત્રી હર્ષ સંઘવીએ જાતે સંભાળી કમાન; બનાસ ડેરીના 325 કરોડના ‘મેગા પ્રોજેક્ટ’નું થશે ભવ્ય લોકાર્પણ!