Vadodaraના યુનાઇટેડ વે ગરબામાં અશ્લીલ વીડિયો બનાવનાર યુગલની ઓળખ સામે આવી

વડોદરામાં નવરાત્રીના પવિત્ર પર્વ દરમિયાન યુનાઇટેડ વે ગરબા મેદાનમાં એક યુગલે અશ્લીલ વીડિયો બનાવીને સોશિયલ મીડિયા પર પોસ્ટ કરતાં મોટો વિવાદ ઊભો થયો છે. આ ઘટનાને કારણે ધાર્મિક લાગણીઓ દુભાઈ હોવાની ફરિયાદો ઉઠી છે. પોલીસ તપાસમાં આ વિવાદિત વીડિયો બનાવનાર યુગલની ઓળખ સામે આવી છે. યુવકનું નામ પ્રતીક પટેલ અને યુવતીનું નામ રુચિ હોવાનું જાણવા મળ્યું છે.

યુનાઇટેડ વે ગરબા મેદાનમાં બનાવ્યો હતો અશ્લીલ વીડિયો

આ યુગલે ગરબાના માહોલમાં અયોગ્ય કૃત્યો કરતો વીડિયો બનાવીને ઇન્સ્ટાગ્રામ જેવા પ્લેટફોર્મ પર મૂક્યો હતો. જે ઝડપથી વાયરલ થતાં સમગ્ર મામલો પોલીસ સુધી પહોંચ્યો હતો. ચોંકાવનારી વાત એ છે કે આ જ યુગલે અગાઉ પણ આ પ્રકારનો વિવાદિત વીડિયો બનાવ્યો હોવાનું સામે આવ્યું છે. ગયા વર્ષે પણ આ યુગલે મુંબઈના પ્રખ્યાત સ્થળ ગેટ વે ઓફ ઇન્ડિયા પાસે ચુંબન કરતો વીડિયો બનાવ્યો હતો અને તેને પણ સોશિયલ મીડિયા પર પોસ્ટ કર્યો હતો.

પોલીસે યુગલની પૂછપરછ શરૂ કરી

વડોદરાના પ્રતિષ્ઠિત ગરબા આયોજનમાં આ પ્રકારનો વીડિયો બનાવવાની ઘટનાને પગલે આયોજકો અને સ્થાનિક લોકોમાં ભારે નારાજગી જોવા મળી રહી છે. પોલીસે આ મામલે કાયદેસરની કાર્યવાહી હાથ ધરી છે અને યુગલની પૂછપરછ કરી રહી છે. ધાર્મિક અને જાહેર સ્થળોની પવિત્રતા જાળવવાની જવાબદારી પર આ ઘટનાએ ગંભીર સવાલ ઊભા કર્યા છે.