Vadodara News: કિશનવાડીમાં વેપારની ખોટના પૈસાની લેવડ-દેવડમાં લોહિયાળ ખેલ, 19 વર્ષીય યુવકનું મોત

વડોદરાના ગોત્રી અને કિશનવાડી વિસ્તારમાં વેપાર-ધંધામાં થયેલી ખોટના પૈસાની લેવડ-દેવડનો મામલો અત્યંત વિક્ષિપ્ત અને લોહિયાળ બન્યો છે. જૂની અદાવત અને નાણાકીય વિવાદને પગલે નવ આરોપીઓની ટોળકીએ ભેગા મળીને ત્રણ વ્યક્તિઓ પર જીવલેણ અને ઘાતકી હુમલો કર્યો હતો. આ હિંસક ઘટનાને પગલે સમગ્ર વિસ્તારમાં સન્નાટો વ્યાપી ગયો હતો અને સ્થાનિક લોકોમાં ભારે તણાવનો માહોલ સર્જાયો હતો.

સારવાર દરમિયાન સુમિત વણઝારાનું કરુણ મોત

આ પાશવી હુમલામાં ત્રણ લોકોને ગંભીર ઈજાઓ પહોંચી હતી, જેમાં 19 વર્ષીય યુવક સુમિત વણઝારા પણ સામેલ હતો. તમામ ઈજાગ્રસ્તોને તાત્કાલિક હોસ્પિટલ ખસેડવામાં આવ્યા હતા, જ્યાં સારવાર દરમિયાન માસૂમ સુમિત વણઝારાએ દમ તોડી દીધો હતો. આ ઘટનામાં હુમલાનો ભોગ બનેલા અન્ય બે વ્યક્તિઓ વિક્રમભાઈ અને શૈલેષભાઈ પણ ગંભીર રીતે ઘાયલ થયા હોવાથી હાલ હોસ્પિટલમાં સારવાર હેઠળ છે.

પોલીસે ગણતરીના કલાકોમાં આરોપીઓને દબોચ્યા

હત્યાની આ ગંભીર ઘટના બનતા જ વડોદરાની બાપોદ પોલીસ એક્શન મોડમાં આવી ગઈ હતી. પોલીસે અલગ-અલગ ટીમો બનાવીને તાત્કાલિક ચક્રો ગતિમાન કર્યા હતા અને ગુનો આચરીને ફરાર થઈ ગયેલા તમામ નવ આરોપીઓને ઝડપી પાડવામાં સફળતા મેળવી છે. પોલીસે પકડાયેલા તમામ આરોપીઓ વિરુદ્ધ હત્યા (મર્ડર) સહિતની વિવિધ ગંભીર કલમો હેઠળ ગુનો નોંધીને આગળની સઘન કાયદેસરની તપાસ હાથ ધરી છે.

ગુજરાતના વધુ સમાચાર વાંચવા માટે ક્લિક કરો