Surendranagar: 46 ટકાએ રેશનકાર્ડમાં ઈ-KYC કરાવ્યું , 54 ટકા હજુ બાકી

સમગ્ર દેશમાં હાલ રેશનકાર્ડમાં નોંધાયેલા સભ્યોનુ ઈ-કેવાયસી કરવાનું સરકારે અભિયાન શરૂ કર્યુ છે. પરંતુ સુરેન્દ્રનગર જિલ્લામાં આ કામગીરી મંદ ગતીએ ચાલી રહી છે. લોકો ઈ-કેવાયસી માટે હેરાન-પરેશાન થઈ જાય છે. ત્યારે જિલ્લામાં હાલ 46 ટકા લોકોનું ઈ-કેવાયસી થઈ ગયુ હોવાનું સામે આવ્યુ છે. બીજી તરફ તંત્રે ઈ-કેવાયસી માટે માર્ગદર્શીકા પણ જાહેર કરી છે.ભારત સરકાર દ્વારા લાભાર્થીઓની ઓળખ માટે રેશનકાર્ડને આધાર નંબર સાથે સીડ કરી સાચા અને તેજ વ્યકિતના આધારે નંબરો સીડ થાય તે માટે 100 ટકા ઈ-કેવાયસીનું શરૂ કર્યુ છે. પરંતુ જિલ્લામાં લોકો ઈ-કેવાયસી માટે ઠેર ઠેર ધક્કા ખાઈ રહ્યા છે. સરકારી કચેરીઓમાં વહેલી સવારથી ઈ-કેવાયસી માટે લાંબી લાઈનો લાગે છે. અને પોતાના ધંધા રોજગાર છોડીને આખો દિવસ ઈ-કેવાયસી માટે બગાડે છે. આ અંગે જિલ્લા પુરવઠા અધિકારી એ. જી. ગજ્જરના જણાવાયા મુજબ સરકારની વિવિધ કલ્યાણકારી યોજનાઓમાં મળતા લાભો અને ડીબીટી સહાયમાં પારદર્શીતા લાવવા ઈ-કેવાયસી જરૂરી છે. લોકોએ વિવિધ પ્રચાર માધ્યમોમાં ફેલાતી ખોટી ભ્રામક માહિતીઓ અને અફવાઓથી દુર રહેવુ જોઈએ. આ ઉપરાંત રેશનકાર્ડ ધારક ઘરે બેઠા મોબાઈલ એપ્લીકેશન માય રેશન વડે ફેસ ઓથેન્ટીકેશન કરી ઈ-કેવાયસી કરાવી શકે છે. જયારે ગ્રામ્ય કક્ષાએ ઈ-ગ્રામ કેન્દ્ર ખાતે બાયોમેટ્રીક પધ્ધતીથી ઈ-કેવાયસી થાય છે. આ ઉપરાંત તાલુકા કક્ષાએ મામલતદાર ઓફીસ, નગરપાલિકા, પુરવઠા વિભાગ, વ્યાજબી ભાવની દુકાન તેમજ સરકારી શાળામાં આચાર્ય મારફતે પીડીએસ+ એપ્લીકેશનથી ઈ-કેવાયસી કરાવી શકાય છે. આથી વહેલામાં વહેલી તકે લોકોએ પોતાનું ઈ-કેવાયસી કરાવી લેવુ જોઈએ. જિલ્લામાં અત્યાર સુધીમાં 45 ટકા લોકોએ પોતાનું ઈ-કેવાયસી કરાવ્યુ છે. જયારે બાકીના લોકોનું પણ ઈ-કેવાયસી થાય તે માટે તંત્ર પુરતી તૈયારીઓ અને સવલત ઉપલબ્ધ કરાવી રહ્યુ છે.