Suratના ઘનશ્યામ નગરમાં મોડી રાત્રે સામાન્ય બાબતે બે જૂથો વચ્ચે ખેલાયું ધીંગાણું!

ડાયમંડ સિટી સુરતના ઘનશ્યામ નગર વિસ્તારમાં આવેલી શિવાપાર્ક સોસાયટીમાં મોડી રાત્રે બે જૂથો વચ્ચે ઉગ્ર ઘર્ષણ સર્જાયું હોવાની ઘટના સામે આવી છે. માહિતી અનુસાર, રસ્તા પર બાઈક સામાન્ય રીતે અથડાઈ જવાની ક્ષુલ્લક બાબતે બોલાચાલી શરૂ થઈ હતી, જે જોતજોતામાં વધી જતાં બંને પક્ષોના લોકો સામસામે આવી ગયા હતા. સામાન્ય બોલાચાલીમાંથી શરૂ થયેલો આ ઝઘડો તુરંત જ જૂથ અથડામણમાં ફેરવાઈ ગયો હતો.

છૂટા હાથની મારપીટ અને લાકડાના ફટકાબાજી

બંને જૂથો વચ્ચે ઉશ્કેરાટ એટલો વધી ગયો હતો કે શિવાપાર્કમાં જાહેરમાં જ છૂટા હાથની મારપીટ અને લાકડાના ફટકા વડે સામસામે હુમલા કરવામાં આવ્યા હતા. આ લોહિયાળ ઝઘડાના કારણે રાત્રિના સમયે વિસ્તારમાં ભારે નાસભાગ અને અફરાતફરીનો માહોલ સર્જાયો હતો. સ્થાનિક રહીશો દ્વારા આ સમગ્ર હિંસક ઘટનાનો વીડિયો પોતાના મોબાઈલ કેમેરામાં કેદ કરી લેવામાં આવ્યો હતો, જે બાદમાં સોશિયલ મીડિયા પર ખુબ વાયરલ થતાં સમગ્ર શહેરમાં ચર્ચાનો વિષય બન્યો છે.

પોલીસ પહોંચે તે પહેલાં સમાધાન

ઘટના અંગેની જાણ થતાં જ સ્થાનિક પોલીસ મથકની ટીમ તાત્કાલિક સ્થળ પર દોડી આવી હતી. પરંતુ પોલીસ કાફલો શિવાપાર્ક પહોંચે તે પહેલાં જ બંને પક્ષના આગેવાનો અને લોકો વચ્ચે અંદરોઅંદર સમાધાન થઈ ગયું હતું. સમાધાન થઈ જવાના કારણે બંનેમાંથી એકપણ પક્ષ દ્વારા પોલીસ સ્ટેશનમાં સત્તાવાર રીતે કોઈ જ ફરિયાદ નોંધાવવામાં આવી નથી. તેમ છતાં સોશિયલ મીડિયામાં વીડિયો વાયરલ થતાં પોલીસે સમગ્ર મામલે આંતરિક તપાસ ચાલુ રાખી છે.

ગુજરાતના વધુ સમાચાર વાંચવા માટે ક્લિક કરો