Surat: મનપા દ્વારા બાંધકામ સાઇટ્સ પર ચેકિંગ હાથ ધરી મચ્છરોના બ્રીડિંગ મળતા નોટિસ, 2.35 લાખનો દંડ ઝીંકાયો

સુરત શહેરમાં ચોમાસાની શરૂઆત થતાં જ પાણીજન્ય અને મચ્છરજન્ય રોગો માથું ન ઉંચકે તે માટે સુરત મહાનગરપાલિકાનું તંત્ર હરકતમાં આવ્યું છે. સામાન્ય રીતે કન્સ્ટ્રક્શન સાઇટ્સ પર પાયા ખોદવાના કારણે અથવા મટીરિયલ મિક્સિંગ માટે રાખવામાં આવતા પાણીના કૂંડા અને ખુલ્લા ખાડાઓમાં લાંબા સમય સુધી પાણી ભરાઈ રહે છે. આ સ્થિર પાણીમાં ડેન્ગ્યુ ફેલાવતા એડીસ ઇજિપ્તી અને મલેરિયાના એનોફિલિસ મચ્છરો ખૂબ જ ઝડપથી ઇંડા મૂકે છે, જે આસપાસના સમગ્ર રહેણાંક વિસ્તારના લોકોના આરોગ્ય માટે જોખમ ઊભું કરે છે.

સુરત મનપાનો બિલ્ડરો પર મોટો કોરડો

આ બાબતની ગંભીરતાને સમજી SMC ની મેલેરિયા વિભાગની જુદી-જુદી ટીમોએ કતારગામ, વરાછા, રાંદેર, અને ઉધના સહિતના તમામ ઝોનમાં આવેલી બાંધકામ સાઇટો પર આકસ્મિક સર્ચ ઓપરેશન હાથ ધર્યું હતું. આ તપાસ દરમિયાન 120 જેટલા પ્રોજેક્ટ્સ પર મચ્છરોના જીવંત બ્રીડિંગ જોવા મળ્યા હતા, જેને જંતુનાશક દવાઓ છાંટી તુરંત નાશ કરાયો હતો. પ્રશાસને નમૂના લઈ તમામ સાઇટ મેનેજરોને નોટિસ પાઠવી સ્થળ પર જ કુલ 2.35 લાખ રૂપિયાનો દંડ વસૂલ્યો હતો.

સુરત હેલ્થ ડિપાર્ટમેન્ટની કડક ટાસ્ક ફોર્સ ડ્રાઇવ

આ ડ્રાઇવમાં સૌથી ગંભીર ક્ષતિ વરાછા-સરથાણા ઝોન હેઠળ આવતી 'નવકાર હેવન' સાઇટ પર જોવા મળી હતી. અહીં ગાઇડલાઇનનું ખુલ્લેઆમ ઉલ્લંઘન કરીને મચ્છરોના ઉત્પત્તિ સ્થાનોને વધવા દેવામાં આવ્યા હતા, જેના કારણે તંત્રએ કડક વલણ અપનાવી બિલ્ડર પાસેથી 22,000 રૂપિયાનો સ્પોટ ફાઇન વસૂલ કર્યો છે. આરોગ્ય અધિકારીએ જણાવ્યું છે કે, આ ઝુંબેશ આગામી દિવસોમાં પણ ચાલુ રહેશે. જો કોઈપણ સ્કૂલ, મોલ, કોમર્શિયલ કોમ્પ્લેક્સ કે બાંધકામ સાઇટ પર મચ્છરોના બ્રીડિંગ મળશે તો દંડની સાથે સીલિંગ સુધ્ધાંની આકરી કાયદાકીય કાર્યવાહી કરવામાં આવશે.

આ પણ વાંચો: Surat: ગોડાદરામાં હોર્ન મારવા બાબતે આતંક મચાવી વાહનો તોડનારી ગેંગના 7 સાગરીતો હથિયારો સાથે ગિરફ્તાર