Mehsana News: ખેરાલુ-સતલાસણાના ખેડૂતો માટે પાણી મુદ્દે મોટી રાહત, ધરોઈ ડેમમાંથી 14 ગામોના તળાવો ભરાશે

મહેસાણા જિલ્લાના ખેરાલુ અને સતલાસણા વિસ્તારના ખેડૂતો માટે પાણી મુદ્દે મોટી રાહતની જાહેરાત થઈ છે. ધરોઈ ડેમમાંથી પાણી લિફ્ટ કરીને આસપાસના તળાવો અને ચેકડેમો ભરવાની સૈદ્ધાંતિક મંજૂરી આપવામાં આવી છે. આ યોજનાથી વિસ્તારમાં લાંબા સમયથી ચાલી આવતી પાણીની અછત ઘટાડવામાં મદદ મળશે. સરકાર દ્વારા પાઈપલાઈન મારફતે પાણી લિફ્ટિંગની વ્યવસ્થા કરવાની યોજના બનાવવામાં આવી છે.

14 ગામોના તળાવો અને 24 ચેકડેમો ભરાશે

આ પ્રોજેક્ટ હેઠળ હડોલ અને ડભોડા આસપાસના 14 ગામોના તળાવો ભરવામાં આવશે. સાથે જ 24 ચેકડેમોને પણ પાણીથી ભરવાની મંજૂરી આપવામાં આવી છે. આ કામગીરી માટે લગભગ 95.85 કરોડ રૂપિયાની સૈદ્ધાંતિક મંજૂરી મળતા ખેડૂતોમાં આનંદની લાગણી ફેલાઈ છે. પાણી ઉપલબ્ધ થતા ખેતી માટે સિંચાઈ સુવિધા વધુ મજબૂત બનશે અને ખેડૂતોને પાક માટે જરૂરી પાણી સમયસર મળી રહેશે.

ખેડૂતોમાં ખુશી, ધારાસભ્ય સન્માન કાર્યક્રમ યોજાયો

આ નિર્ણય બાદ સ્થાનિક ખેડૂતો અને ગ્રામજનોમાં ખુશીનો માહોલ જોવા મળ્યો હતો. ખેડૂતોએ રાજ્ય સરકાર, મુખ્યમંત્રી, સિંચાઈ મંત્રી તેમજ સ્થાનિક ધારાસભ્યનો આભાર વ્યક્ત કર્યો હતો. આ પ્રસંગે સતલાસણા તાલુકાના હોટલપુર ગામે ધારાસભ્ય સન્માન કાર્યક્રમનું આયોજન કરવામાં આવ્યું હતું. કાર્યક્રમમાં વિવિધ ગામોના આગેવાનો હાજર રહ્યા હતા અને ધારાસભ્ય સરદારભાઈ ચૌધરીનું સન્માન કરી વિકાસ યોજનાઓ બદલ આભાર વ્યક્ત કર્યો હતો.

ગુજરાતના વધુ સમાચાર વાંચવા માટે ક્લિક કરો