Dhandhuka: તાલુકામાં વીજ ચોરીની બદી સામે વીજ કંપનીની કડક કાર્યવાહી

ધંધુકા તાલુકાના વિવિધ ગામો અને શહેર વિસ્તારમાં વીજચોરીના વધી રહેલા બનાવોને ધ્યાનમાં લઈ આજે UGVCL અને GUVNL દ્વારા સંયુક્ત રીતે વિશેષ ચેકિંગ ઝુંબેશ હાથ ધરવામાં આવી હતી. આ તપાસ દરમિયાન 83 વિજ કનેક્શનોની ચકાસણી કરવામાં આવી હતી, જેમાં આશરે 55 લાખની વીજ ચોરી પકડાઈ હોવાનું અધિકારીઓએ જણાવ્યું હતું.

આ ચેકિંગ દરમિયાન રોજકા, ખરડ, કોઠડીયા, ખડોલ, રાયસંગઢ અને ધંધુકા શહેર વિસ્તારના ઉપભોક્તાઓના કનેક્શનો ચકાસવામાં આવ્યા હતા. અનેક સ્થળોએ વિજચોરી કરતી કાયમી લાઇનો, મીટર બાયપાસ અને સીધા હૂક લગાવી વિજળીના ગેરકાયદેસર ઉપયોગના બનાવો સામે આવ્યા હતા. વિજ કંપનીએ તાત્કાલિક અસરથી ચોરી પકડાયેલા ગ્રાહકોના વિજ પુરવઠાને બંધ કરી દંડ પ્રક્રિયા શરૂ કરી છે. અધિકારીઓના જણાવ્યા મુજબ વિજચોરી વિરુદ્ધ કાયદેસરની કાર્યવાહી હાથ ધરવામાં આવશે અને જરૂર પડે ત્યાં પોલીસ ફરિયાદ પણ નોંધાવવામાં આવશે. અધિકારીઓએ જણાવ્યુ હતું કે આવનારા સમયમાં પણ આવી અચાનક ચેકિંગ ઝુંબેશો યથાવત રહેશે અને વીજચોરી કરનારા વિરુદ્ધ કડક પગલાં લેવાશે. વિજ કંપનીએ નાગરિકોને અપીલ કરી છે કે તેઓ કાયદેસર રીતે વિજળી વાપરે અને કોઈપણ પ્રકારની વીજ ગેરરીતિ જણાય તો નજીકની વિજ કચેરીમાં જાણ કરવી.