Dahodમાં નકલી જજ ઝડપાયો, કોર્ટ કેસના નિકાલની લાલચ આપીને કરતા હતો ઠગાઈ

દાહોદ જિલ્લામાં એક વ્યક્તિ દ્વારા જજ તરીકેની ખોટી ઓળખ આપીને લોકો સાથે છેતરપિંડી કરવાનો એક ચોંકાવનારો કિસ્સો સામે આવ્યો છે. દાહોદ પોલીસે આ નકલી જજની ધરપકડ કરીને વધુ કાર્યવાહી હાથ ધરી છે. આરોપી મૂળ બનાસકાંઠા જિલ્લાનો રહેવાસી છે. તે પોતાની જાતને જજ તરીકે રજૂ કરતો હતો અને લોકોને કોર્ટ કેસનો નિકાલ લાવી આપવાની લાલચ આપીને તેમની સાથે છેતરપિંડી કરતો હતો.

બનાસકાંઠાના યુવકની સુરત નજીકથી કરાઈ ધરપકડ

એટલું જ નહીં પોલીસને તપાસ દરમિયાન એવા પુરાવા પણ મળ્યા છે કે તે વકીલ સહિતના અન્ય અલગ-અલગ સરકારી હોદ્દાઓની પણ ખોટી ઓળખ આપતો હતો. આ ઠગનો પર્દાફાશ ત્યારે થયો જ્યારે તે દાહોદ નજીકના એક પેટ્રોલ પંપ પર જજ હોવાનો રોફ જમાવીને ફરાર થયો હતો. પેટ્રોલ પંપના કર્મચારીની ફરિયાદના આધારે પોલીસે તાત્કાલિક કાર્યવાહી હાથ ધરી હતી. પોલીસે ટેક્નિકલ સર્વેલન્સ અને બાતમીદારોની મદદથી આ યુવકને સુરત નજીકથી ઝડપી પાડ્યો છે.

ખોટી ઓળખ આપી લોકોને વાતોમાં ભરમાવતો હતો

આરોપી લોકોને વિશ્વાસમાં લેવા માટે તેમની સાથે વાતચીતમાં ખૂબ જ કુશળ હતો અને વાતોમાં ભ્રમિત કરીને છેતરપિંડી આચરતો હતો. હાલમાં પોલીસે તેની ધરપકડ કરી છે અને તેને કોર્ટમાં રજૂ કરવાની પ્રક્રિયા હાથ ધરી છે. આ ઘટનાએ ફરી એકવાર સાબિતી આપી છે કે આવા નકલી અધિકારીઓથી સાવધાન રહેવું અત્યંત જરૂરી છે. પોલીસ આ મામલે અન્ય કોઈ ગુનાઓ આચર્યા છે કે કેમ તે દિશામાં પણ તપાસ કરી રહી છે.