Bhavnagar Crime News: જુગારધામ પર ડ્રોન સ્ટ્રાઈક, 3 ઝડપાયા

ભાવનગર લોકલ ક્રાઇમ બ્રાન્ચ દ્વારા ગુનાખોરી ડામવા માટે હવે ટેકનોલોજીનો સહારો લેવામાં આવી રહ્યો છે. ભાવનગર શહેરમાં ચાલી રહેલી ગેરકાયદેસર પ્રવૃત્તિઓ પર બાજ નજર રાખવા માટે ડ્રોન કેમેરાનો ઉપયોગ કરીને પોલીસે એક સફળ ઓપરેશન પાર પાડ્યું છે. જેમાં ગંજીપત્તાનો જુગાર રમતા ત્રણ ઈસમોને રોકડ રકમ સાથે રંગેહાથ ઝડપી લેવામાં આવ્યા છે.

ડ્રોનથી રખાઈ બાજ નજર

સામાન્ય રીતે જુગારીઓ પોલીસની ગાડીનો અવાજ સાંભળીને નાસી જતા હોય છે, પરંતુ ભાવનગર LCB એ આ વખતે અલગ જ રણનીતિ અપનાવી હતી. પોલીસે સંભવિત જુગારધામ પર આકાશમાંથી ડ્રોન દ્વારા નિરીક્ષણ કર્યું હતું. ડ્રોન કેમેરામાં જુગાર રમી રહેલા શખ્સોની હિલચાલ કેદ થઈ જતાં, પોલીસે ચોક્કસ લોકેશન પર રેડ કરી હતી.

મુદ્દામાલ અને ધરપકડ

પોલીસની રેડ દરમિયાન જાહેરમાં હાર-જીતનો જુગાર રમતા ત્રણ શખ્સો પોલીસના હાથે ઝડપાઈ ગયા હતા. પોલીસે તેમની પાસેથી કુલ રોકડ રૂપિયા 37900, ગંજીપત્તાના પાના અને અન્ય સાહિત્ય સહિતનો મુદ્દામાલ જપ્ત કર્યો છે. પોલીસની આ આકસ્મિક કાર્યવાહીથી જુગારી આલમમાં ફફડાટ વ્યાપી ગયો છે.

પોલીસને ચકમો આપવા માટે અંતરિયાળ કે છુપાયેલી જગ્યાએ જુગાર રમતા તત્વો માટે હવે પોલીસનું ડ્રોન ‘આફત’ બનીને ત્રાટક્યું છે. ઝડપાયેલા ત્રણેય ઈસમો વિરુદ્ધ જુગારધારા હેઠળ ગુનો નોંધી આગળની કાયદેસરની તપાસ હાથ ધરવામાં આવી છે.

આ પણ વાંચો - Bhavnagar News: સમાધાનના બહાને જમાઈના પરિવારને માર માર્યો