Ahmedabad માં સરકારી નોકરીના નામે કરોડોની મહાઠગાઈ, બનાવટી નિમણૂક પત્રો બનાવીને કરી છેતરપિંડી

અમદાવાદમાં સરકારી નોકરી અપાવવાના બહાને લોકો સાથે કરોડોની છેતરપિંડીનો એક વધુ મોટો કિસ્સો સામે આવ્યો છે. આ ઠગ ટોળકીના સભ્યોએ પોતાને વર્ગ-1 અધિકારી તરીકે ઓળખ આપીને પાંચ જેટલા યુવકોને સરકારી નોકરીની લાલચ આપી હતી. આરોપીઓએ ભોગ બનનાર લોકોને આરોગ્ય વિભાગ સહિત અન્ય સરકારી વિભાગોમાં નોકરી અપાવવાનું આશ્વાસન આપ્યું હતું, જેમાં સોલા સિવિલ હોસ્પિટલમાં ક્લાર્કની નોકરીની પણ લાલચ આપી હતી. આ રીતે આરોપીઓએ પાંચ યુવકો પાસેથી કુલ રૂ. 1.07 કરોડ જેટલી માતબર રકમ પડાવી લીધી હતી.

બનાવટી નિમણૂંક લેટર બનાવી વિશ્વાસ કેળવ્યો

નોકરીની લાલચ આપીને પૈસા પડાવ્યા બાદ, આરોપીઓએ ભોગ બનનારાઓનો વિશ્વાસ જીતવા માટે બનાવટી નિમણૂંક પત્રો (અપોઇન્ટમેન્ટ લેટર્સ) પણ બનાવીને મોકલ્યા હતા. આ નકલી લેટર્સના આધારે યુવકોને વિશ્વાસ બેઠો કે તેમની નોકરી પાક્કી થઈ ગઈ છે. જોકે, જ્યારે યુવકોને લાંબા સમય સુધી નોકરી પર હાજર થવાની તક ન મળી અને તેમને શંકા ગઈ, ત્યારે સમગ્ર છેતરપિંડીનો પર્દાફાશ થયો હતો. આ બનાવ અંગે ભોગ બનનાર યુવકે રામોલ પોલીસ સ્ટેશનમાં ફરિયાદ નોંધાવી છે.

આરોપીઓ સામે ફરિયાદ, પોલીસ તપાસ શરૂ

આ છેતરપિંડીના મામલે રામોલ પોલીસે ત્રણ આરોપીઓ, સાજિદ અલી ખોખર, સંતોષ પ્રસાદ અને મહેશ બારોટ સામે ગુનો દાખલ કરીને તપાસ હાથ ધરી છે. નોંધનીય છે કે, ગુજરાતમાં છેલ્લા કેટલાક સમયથી નકલી સરકારી નોકરી અપાવવાના નામે છેતરપિંડીના અનેક કિસ્સાઓ સામે આવી રહ્યા છે. જેમાં આરોપીઓ બોગસ વેબસાઇટ્સ, ખોટા નિમણૂંક પત્રો અને સરકારી અધિકારી તરીકેની ખોટી ઓળખ આપીને બેરોજગાર યુવકોને નિશાન બનાવે છે. આ કિસ્સામાં પણ પોલીસે આરોપીઓની ધરપકડ કરીને આ છેતરપિંડીના નેટવર્કને તોડવા માટે કાર્યવાહી શરૂ કરી દીધી છે.