Ahmedabad: પત્ની સાથેના આડાસંબંધની શંકામાં શખ્સે ભાઈ સાથે મળી યુવકને ચપ્પુના ઘા-માર્યા

શહેરના શાહીબાગમાં પ્રેમસંબંધની શંકા રાખીને બે ભાઇઓએ યુવકને ચપ્પુના ઘા મારીને લોહીલુહાણ કરી નાખ્યો હતો. યુવક તેના મિત્ર સાથે શાહીબાગ અંડરબ્રિજ પાસે સિગારેટ પીતો હતો તે સમયે બંને એક્ટિવા પર આવીને ઝઘડો કર્યો હતો. આ અંગે યુવકે બંને શખ્સો સામે શાહીબાગ પોલીસ સ્ટેશનમાં ફરિયાદ નોધાવી છે.માધુપુરામાં રહેતા અરવિંદભાઇ બોડાણા કપડાની દુકાનમાં નોકરી કરે છે. ગત 6 નવેમ્બરે તેઓ ઘરે હતા ત્યારે મિત્ર ભૂરો મળવા આવ્યો હતો. ત્યારબાદ બંને બાઇક લઇને શાહીબાગ અંડરબ્રિજ પાસે જઇને સિગારેટ પીતા હતા. આ દરમિયાન જયેશ વાઘેલા અને તેનો ભાઇ ભાવેશ વાઘેલા એક્ટિવા લઇને અરવિંદભાઇ પાસે આવ્યા હતા. જે બાદ અરવિંદભાઇને જયેશની પત્ની સાથે આડાસંબંધ હોવાની શંકા રાખીને બિભત્સ ગાળો બોલીને માર મારવા લાગ્યા હતા. બાદમાં બંનેએ અરવિંદભાઇને ચપ્પુના ઘા મારીને લોહીલુહાણ કરી નાખ્યા હતા. બૂમાબૂમ થતા આસપાસના લોકો આવી જતા બંને ત્યાંથી નાસી ગયા હતા. તેમજ મિત્ર ભૂરો પણ ત્યાંથી જતો રહ્યો હતો. જ્યારે ઇજાગ્રસ્ત અરવિંદભાઇને સારવાર અર્થે હોસ્પિટલમાં લઇ જવામાં આવ્યા હતા. આ અંગે અરવિંદભાઇએ બંને શખ્સો સામે શાહીબાગ પોલીસ સ્ટેશનમાં ફરિયાદ નોંધાવી છે. પોલીસે બંને શખ્સો સામે ફરિયાદ નોંધી વધુ તપાસ હાથ ધરી છે.