Ahmedabad News: કરોડોની ચોરી કરનાર શાતિર શખ્સ નારોલ પોલીસની ઝપટે, 1 કરોડથી વધુના દાગીના અને ડોલરની કરી હતી લૂંટ

રાજ્યના પાટનગર ગાંધીનગરમાં થયેલી એક મોટી ચોરીના ગુનાનો ભેદ ઉકેલવામાં અમદાવાદની નારોલ પોલીસને સફળતા મળી છે. પોલીસે બાતમીના આધારે કાર્યવાહી કરી માલાભાઈ સમોટા નામના આરોપીની ધરપકડ કરી છે, જેણે ગાંધીનગર વિસ્તારમાં રહેણાંક મકાનને નિશાન બનાવી કરોડોની મતાની ચોરી કરી હતી.

1 કરોડથી વધુની મતાની ચોરી

પકડાયેલા આરોપી માલાભાઈએ ગાંધીનગરમાં એક બંધ મકાનમાં ત્રાટકીને ભારે હાથફેરો કર્યો હતો. પ્રાથમિક તપાસ મુજબ, આ ચોરીમાં 1 કરોડ રૂપિયાથી વધુની કિંમતના સોના-ચાંદીના કિંમતી દાગીના તેમજ વિદેશી ચલણ એટલે કે ડોલરની પણ ચોરી કરવામાં આવી હતી. આરોપીએ અત્યંત વ્યવસ્થિત રીતે રેકી કરીને આ ગુનાને અંજામ આપ્યો હોવાનું બહાર આવ્યું છે.

નારોલ પોલીસે કરી ધરપકડ

ગાંધીનગર પોલીસ આ કેસમાં તપાસ કરી રહી હતી, તે દરમિયાન અમદાવાદની નારોલ પોલીસને આ શાતિર આરોપી માલાભાઈ સમોટા અંગે ચોક્કસ કડીઓ મળી હતી. નારોલ પોલીસે વોચ ગોઠવીને તેને ઝડપી લીધો છે. પોલીસ હવે એ દિશામાં તપાસ કરી રહી છે કે, આ ગુનામાં તેની સાથે અન્ય કેટલા શખ્સો સામેલ હતા અને અત્યાર સુધીમાં તેણે ક્યાં-ક્યાં ચોરીની મતા છુપાવી છે.

આરોપીના ઝડપાઈ જવાથી ગાંધીનગરના અન્ય ચોરીના ગુનાઓના ભેદ ઉકેલાવાની પણ શક્યતા સેવાઈ રહી છે.

આ પણ વાંચો - Ahmedabad News: ઢેઢાળ વાસણામાં જૂની અદાવતમાં ખેલાયો ખૂની ખેલ, યુવક પર ધારિયા વડે જીવલેણ હુમલો