Suratના પીપોદરામાં અજાણ્યા શખ્સે 3 રાઉન્ડ ફાયરીંગ કરતા એક વ્યક્તિ ઈજાગ્રસ્ત, પોલીસે તપાસ શરૂ કરી

સુરત નજીક આવેલા પીપોદરાના ડાભરિયા વિસ્તારમાં આજે એક ચોંકાવનારી ફાયરિંગની ઘટના બની છે. એક અજાણ્યા વ્યક્તિએ ત્રણ રાઉન્ડ ગોળીબાર કર્યો હતો. જેમાં ઓમપ્રકાશ શાહ નામના વ્યક્તિને ગોળી વાગતા તેને ઈજા પહોંચી હતી. આ ઘટનાને પગલે સમગ્ર વિસ્તારમાં ભયનો માહોલ ફેલાઈ ગયો હતો. ડાભરિયા વિસ્તારમાં અચાનક ફાયરિંગનો અવાજ સંભળાતા લોકોમાં નાસભાગ મચી ગઈ હતી.

પિપોદરાના ડાભરિયા વિસ્તારમાં ફાયરિંગ

ફાયરિંગ કરનાર અજાણ્યો શખ્સ ઘટનાને અંજામ આપીને તરત જ ફરાર થઈ ગયો હતો. આ ઘટનામાં ઓમપ્રકાશ શાહને ગોળી વાગી હતી અને તે ગંભીર રીતે ઇજાગ્રસ્ત થયો હતો. ઇજાગ્રસ્તને તાત્કાલિક સારવાર અર્થે નજીકની હોસ્પિટલમાં ખસેડવામાં આવ્યો હતો. ઘટનાની જાણ થતાં જ પોલીસ કાફલો તાત્કાલિક ઘટનાસ્થળે દોડી આવ્યો હતો. પોલીસે સ્થળ પરથી જરૂરી પુરાવા એકત્ર કર્યા હતા અને આસપાસના લોકોની પૂછપરછ શરૂ કરી હતી.

પોલીસ દ્વારા ઘટના સ્થળે પહોંચી તપાસ શરુ કરાઇ

પોલીસે ફાયરિંગના કારણ અને હુમલાખોરની ઓળખ માટે તપાસના ચક્રો ગતિમાન કર્યા હતા. આ ઘટના પાછળ કોઈ અંગત અદાવત કે અન્ય કોઈ કારણ જવાબદાર છે કે કેમ તે દિશામાં પોલીસે તપાસ શરૂ કરી હતી. સુરત જેવા વ્યસ્ત શહેરની નજીક આ પ્રકારની ફાયરિંગની ઘટના બનતા કાયદો અને વ્યવસ્થાની પરિસ્થિતિ સામે સવાલો ઉભા થયા હતા. પોલીસ દ્વારા આરોપીને વહેલી તકે પકડી પાડવાની ખાતરી આપવામાં આવી હતી.