Surat news: સચિન વિસ્તારમાંથી બે ઠગબાજો ઝડપાયા, 3,700થી વધુ લોકો સાથે લાખોની છેતરપિંડીનો પર્દાફાશ

ડિજિટલ યુગમાં ઓનલાઇન શોપિંગનો ક્રેઝ વધ્યો છે, ત્યારે તેની સાથે સંકળાયેલા ગુનાઓમાં પણ ઉછાળો આવ્યો છે. સુરત સાયબર ક્રાઇમ સેલ દ્વારા એક એવી શાતિર ગેંગને ઝડપી લેવામાં આવી છે, જે ઓનલાઇન શોપિંગના નામે નિર્દોષ લોકોના ખિસ્સા ખંખેરતી હતી. પોલીસે સુરતના સચિન વિસ્તારમાં રેડ કરીને આ ગેંગના બે સાગરીતને દબોચી લીધા છે.

3,700થી વધુ ઓર્ડર અને લાખોની ઠગાઈ

પોલીસ તપાસમાં જે વિગતો બહાર આવી છે તે ચોંકાવનારી છે. આ આરોપીઓએ સોશિયલ મીડિયા અને અન્ય પ્લેટફોર્મ પર લોભામણી જાહેરાતો મૂકી સમગ્ર દેશમાંથી અંદાજે 3,762 જેટલા ઓર્ડર મેળવ્યા હતા. ગ્રાહકોને સસ્તા દરે વસ્તુઓ આપવાની લાલચ આપી આ ટોળકીએ અત્યાર સુધીમાં કુલ રૂપિયા 22.86 લાખની છેતરપિંડી આચરી હોવાનું સામે આવ્યું છે. લોકો ઓર્ડર બુક કરાવતા પરંતુ તેમને વસ્તુ મળતી નહીં અથવા તો છેતરપિંડી કરવામાં આવતી હતી.

મુદ્દામાલ અને ધરપકડ

સુરત સાયબર ક્રાઇમ સેલની ટીમે ટેકનિકલ સર્વેલન્સ અને બાતમીના આધારે સચિન વિસ્તારમાં ઓપરેશન હાથ ધર્યું હતું. પકડાયેલા આરોપીઓ પાસેથી પોલીસને ગુનામાં વપરાતા સાધનો મળી આવ્યા છે, જેમાં 10 મોબાઈલ ફોન, 10 ડેબિટ કાર્ડ અને 9 ચેકબુક જપ્ત કરવામાં આવ્યા છે. પોલીસ દ્વારા કુલ રૂપિયા 2.49 લાખનો મુદ્દામાલ જપ્ત કરવામાં આવ્યો છે. આ ગેંગના અન્ય સભ્યો કોણ છે અને તેઓ આ નાણાંનો ક્યાં ઉપયોગ કરતા હતા તે દિશામાં પોલીસે તપાસ તેજ કરી છે. સુરત પોલીસ દ્વારા નાગરિકોને અજાણી વેબસાઇટ કે લિંક પરથી શોપિંગ કરતા પહેલા સાવચેત રહેવા અપીલ કરવામાં આવી છે.

આ પણ વાંચો - Surat સાયબર ક્રાઇમની ટીમે દુબઈથી સંચાલિત આંતરરાષ્ટ્રીય 'મિલન દરજી ગેંગ'ના બે સાગરીતોની કરી ધરપકડ