Kalol પોલીસ દ્વારા 'તેરા તુજકો અર્પણ' એક અનોખો કાર્યક્રમ યોજાયો

કલોલ પોલીસ દ્વારા ગુમ થયેલી કે ચોરાયેલી વસ્તુઓ તેના મૂળ માલિકોને પરત કરવા માટે એક અનોખો કાર્યક્રમ 'તેરા તુજકો અર્પણ' યોજાયો હતો. આ કાર્યક્રમમાં પોલીસ દ્વારા કુલ 51 લાખ રૂપિયાથી વધુનો મુદ્દામાલ તેના હકદાર માલિકોને સુપરત કરવામાં આવ્યો હતો. જેમાં મોબાઈલ ફોન, દાગીના અને રોકડ રકમનો સમાવેશ થાય છે.

પોલીસે 144 મોબાઈલ ફોન તેના મૂળ માલિકોને પરત કર્યા

આ કાર્યક્રમમાં કુલ 144 મોબાઈલ ફોન તેના મૂળ માલિકોને પરત આપવામાં આવ્યા હતા. આ ઉપરાંત નારદીપુર ગામે થયેલી એક ઘરફોડ ચોરીના કેસમાં ચોરાયેલા દાગીના અને રોકડ રકમ મળીને કુલ 30,15,798 રૂપિયાનો મુદ્દામાલ પણ પરત અપાયો હતો. પોતાની ગુમ થયેલી કે ચોરાયેલી વસ્તુઓ પાછી મળતા લોકોના ચહેરા પર ખુશી છવાઈ ગઈ હતી.

પોલીસની કાર્યક્ષમતા અને પ્રામાણિકતાનું ઉત્તમ ઉદાહરણ

આ કાર્યક્રમ કલોલ પોલીસની કાર્યક્ષમતા અને પ્રામાણિકતા દર્શાવે છે. આ પ્રસંગે કલોલના ધારાસભ્ય બકાજી ઠાકોર, જિલ્લા પોલીસ વડા વાસમ શેટ્ટી રવિ તેજા, ડીવાયએસપી અને કલોલ તાલુકા તથા શહેરના પીઆઇ સહિતના અધિકારીઓ ઉપસ્થિત રહ્યા હતા. મહેમાનોના હસ્તે જ વસ્તુઓ તેના માલિકોને સુપરત કરવામાં આવી હતી. જેણે પોલીસ અને જનતા વચ્ચેના વિશ્વાસને વધુ મજબૂત બનાવ્યો છે.