Ahmedabad: ગોતામાં 13 લાખ ફૂટનું 'માઈન્ડ્સ ટેક પાર્ક' ખુલ્લું મુકતા ગૃહમંત્રી અમિત શાહ, AI પર મૂક્યો ભાર

ડિજિટલ ઇન્ડિયા અને ગ્લોબલ આઇટી (IT) હબ બનવા તરફ અમદાવાદે વધુ એક ઐતિહાસિક સિદ્ધિ હાંસલ કરી છે. અમદાવાદના ગોતા વિસ્તારમાં નવનિર્મિત અને અત્યાધુનિક સુવિધાઓથી સજ્જ 'મિલિયન માઈન્ડ્સ ટેક પાર્ક'નું કેન્દ્રીય ગૃહમંત્રી અમિત શાહના હસ્તે વિધિવત ઉદ્ઘાટન કરવામાં આવ્યું છે. વિશાળ સ્કેલ પર બનેલું આ ટેક પાર્ક આગામી દિવસોમાં હજારો યુવાનો માટે રોજગારી અને સ્ટાર્ટઅપ્સ માટે નવું કેન્દ્ર બનશે.

13 લાખ સ્ક્વેર ફૂટમાં ફેલાયેલું આધુનિક હબ

કાર્યક્રમ દરમિયાન સંબોધન કરતા ગૃહમંત્રી અમિત શાહે જણાવ્યું હતું કે, આ સમગ્ર ટેક પાર્ક 13 લાખ સ્ક્વેર ફૂટના વિશાળ વિસ્તારમાં પથરાયેલું છે. આ પ્રોજેક્ટના કારણે ગુજરાત સર્વિસ સેક્ટરમાં દેશના ટોપ ૩ રાજ્યોમાં સ્થાન મેળવશે. તેમણે ઉમેર્યું કે, ગુજરાતે ઉત્પાદન (Manufacturing) ક્ષેત્રે હંમેશા શ્રેષ્ઠ પ્રદર્શન કર્યું છે, પરંતુ હવે આ પ્રકારના ઇન્ફ્રાસ્ટ્રક્ચરથી સર્વિસ અને આઇટી સેક્ટરમાં પણ આપણે દેશનું નેતૃત્વ કરીશું. અમદાવાદે હવે હૈદરાબાદ અને બેંગલુરુ જેવા આઇટી સિટીઝથી પણ આગળ વધવાનું છે.

ત્રાગડનો વિકાસ અને ટાઉન પ્લાનિંગનું મહત્વ

પોતાના જૂના રાજકીય દિવસો અને વિસ્તારના ભૂતકાળને યાદ કરતા અમિત શાહે ભાવુક સુરે કહ્યું કે, "હું જ્યારે આ વિસ્તારમાંથી પહેલીવાર ધારાસભ્ય (MLA) બન્યો, ત્યારે ત્રાગડ ગામમાં એસ.ટી. બસ પણ આવતી નહોતી. આજે હું પોતે ત્રાગડ ફરીને આવ્યો છું, ત્યાંનો વિકાસ જોઈને અત્યંત આનંદ થયો છે." તેમણે આ અદભુત વિકાસ પાછળ સચોટ 'ટાઉન પ્લાનિંગ' (TP) ને જવાબદાર ગણાવતા કહ્યું કે, જો યોગ્ય ટાઉન પ્લાનિંગ ન હોય તો ક્યારેય સારા અને સુવિધાજનક શહેરો બની શકતા નથી.AI ભવિષ્યની અર્થવ્યવસ્થા

આજના ડિજિટલ યુગ વિશે વાત કરતા ગૃહમંત્રીએ સ્પષ્ટ કર્યું કે, AI (Artificial Intelligence) એ ભવિષ્યની ગ્લોબલ અર્થવ્યવસ્થા છે. ભારત આજે વિશ્વમાં AI ક્ષેત્રે ખૂબ જ મજબૂતી અને ક્ષમતા સાથે આગળ વધી રહ્યું છે. નવી ટેક્નોલોજી અને કુશળ માનવબળ (Talent) ની મદદથી ગુજરાત આગામી સમયમાં સમગ્ર ભારતના તકનીકી વિકાસનું નેતૃત્વ કરશે તેવો અડગ વિશ્વાસ તેમણે વ્યક્ત કર્યો હતો.

આ પણ વાંચો: Bharuch: આમોદમાં પ્રેમપ્રકરણમાં યુવાનની કરપીણ હત્યા, ગળાના ભાગે ચપ્પુના ઘા ઝીંકી 'લાલા'ને મોતને ઘાટ ઉતારાયો