Surat: ઈચ્છાપોરમાં ક્રિકેટ ગ્રાઉન્ડમાંથી નવજાત બાળકી મળી, માતા-પિતાને શોધનારને 11 હજારનું ઇનામ

સુરત શહેરના ઈચ્છાપોર વિસ્તારમાં આવેલ જુના કવાસ ક્રિકેટ ગ્રાઉન્ડમાંથી એક અત્યંત કરુણ અને સંવેદનશીલ ઘટના સામે આવી છે, જ્યાં તાજી જન્મેલી એક નવજાત બાળકી મળી આવી છે.

ક્રિકેટ ગ્રાઉન્ડમાંથી મળી બાળકી

આજે સવારે જ્યારે આસપાસના લોકોને ક્રિકેટ ગ્રાઉન્ડ નજીકથી એક બાળકીના રડવાનો અવાજ સંભળાયો, ત્યારે તેઓ ઘટનાસ્થળે દોડી આવ્યા હતા. ત્યાં પહોંચીને તેમને તાજી જન્મેલી એક ત્યજી દેવાયેલી બાળકી મળી આવતા સમગ્ર વિસ્તારમાં ચકચાર મચી ગઈ હતી. પ્રાથમિક અનુમાન મુજબ, કોઈ મહિલા દ્વારા પોતાના પાપને છુપાવવા કે અન્ય કોઈ કારણોસર આ બાળકીને અહીં છોડી મૂકવામાં આવી હોઈ શકે છે.

 પોલીસ કાર્યવાહી અને સારવાર

ઘટનાની જાણ થતાં જ ઈચ્છાપોર પોલીસ સ્ટેશનનો સ્ટાફ તાત્કાલિક સ્થળ પર દોડી આવ્યો હતો. પોલીસે નવજાત બાળકીને વધુ સારવાર અને સંભાળ માટે તાત્કાલિક સિવિલ હોસ્પિટલ ખાતે ખસેડી હતી. હાલ બાળકીની તબિયત વિશે વધુ માહિતી મેળવવામાં આવી રહી છે. માતા-પિતાને શોધનારને ઇનામ

ઈચ્છાપોર પોલીસે બાળકીને ત્યજી દેનાર માતા-પિતાને શોધી કાઢવા માટે સઘન તપાસ શરૂ કરી છે. આ મામલે પોલીસ દ્વારા એક અનોખું પગલું ભરવામાં આવ્યું છે. પોલીસે બાળકીના માતા-પિતાને શોધી કાઢનાર કે તેમની માહિતી આપનાર વ્યક્તિ માટે ₹11,000નું રોકડ ઇનામ જાહેર કર્યું છે. પોલીસે લોકોને આગળ આવીને આ માનવતા વિરોધી કૃત્ય કરનારને શોધી કાઢવામાં મદદ કરવા અપીલ કરી છે.

આ પણ વાંચો: Porbandarમાં ટ્રાફિક વિવાદ, PIની વેપારીઓને સ્પષ્ટ ચેતવણી, 'ભલે મારી બદલી નાગાલેન્ડ કરાવો, ઝુંબેશ ચાલુ રહેશે'